Kompania Thinking Machines Lab, e themeluar nga inxhinierja shqiptare dhe ish-drejtoresha teknike e OpenAI, Mira Murati, ka prezantuar modelin e saj të parë të inteligjencës artificiale me përdorim të përgjithshëm, të quajtur Inkling, transmeton albinfo.ch.
Sipas raportimit të Financial Times, arkitektura e modelit mbështetet në teknologjinë e modelit kinez DeepSeek-V3, ndërsa për fazën e trajnimit janë përdorur edhe të dhëna të gjeneruara nga modeli Kimi K2.5 i kompanisë kineze Moonshot AI.
Një nga veçoritë kryesore të Inkling është se ai do të ofrohet si një model me peshat e hapura (open weights), duke u mundësuar përdoruesve ta instalojnë në serverët e tyre dhe ta përshtatin sipas nevojave specifike.
Megjithëse aktualisht renditet pas modeleve kryesore të kompanive si OpenAI, Anthropic dhe disa zhvilluesve kinezë të inteligjencës artificiale, Thinking Machines Lab synon të dallohet në treg duke u ofruar përdoruesve më shumë kontroll, fleksibilitet dhe mundësi personalizimi.
Kompania e Muratit tërhoqi vëmendje edhe vitin e kaluar, kur siguroi rreth 2 miliardë dollarë investime, duke arritur një vlerësim prej 12 miliardë dollarësh, çka e rendit atë ndër startup-et më premtuese në industrinë e inteligjencës artificiale./Albinfo.ch
