Ndalo, shiko dhe magjepsu! Piktori që tërheq vëmendjen e turistëve vendas dhe të huaj

Ndalo, shiko dhe magjepsu! Me këto tre fjalë përshkruhet më së miri efekti që krijon arti mbresëlënës i z. Rifat Çeliku, piktori i shëtitores së Sarandës. Mund t’ia vendosim këtë titull fare lehtë pasi ai ushtron aktivitetin e tij aty, prej 10 vitesh. 10 vite rradhazi, z.Rifat ka pikturuar portretet e mijëra turistëve vendas dhe të huaj dhe ka tëhequr vëmendjen e të gjithë kalimtarëve, kurioziteti i të cilëve ndizet kur shohin se portretet që ai bën punohen ‘live’.

Sa i talentuar mund të jetë dikush, që ia arrin në kohë reale të pikturojë aq mrekullisht një njeri? Në një intervistë për ProBizz.al z. Rifat Çeliku tregon se si ka lindur pasioni i tij për artin, vizatimin dhe pikturën. “E mbaj mend, isha në klasë të parë dhe mbaja me vete një bllok të vogël për skicim. Dhe ashtu si fëmijë vizatoja makina, shtëpi, pemë etj.”- tregon ai.

Për gjithë këto vite ai ka qenë i shoqëruar nga dy shokë të tjerë piktorë, Sajgoni dhe Samiu, me të cilët ka punuar edhe jashtë vendit, si në bregdetin Kroat, në Greqi, Itali, Danimarkë dhe Austri. Një mbështetje për të, krahas miqve të shumtë që ka krijuar aty, është edhe stafi i Bashkisë Sarandë, së bashku me Kryebashkiakun Adrian Gurma, ndaj të cilit piktori shpreh falenderimet e tij për përkrahjen që i jep dhe mundësinë që i krijon për të shfrytëzuar hapësirat publike teksa ushtron aktivitetin e tij.

Z. Rifat e gëzon fakti që ka interes të madh nga tursitët si vendas, ashtu edhe të huaj. Ndër gjithë portretet interesante që ka bërë ai do të veçonte njërën, e cila siç duket dhe e ka lodhur paksa: “Ka shumë portrete interesante, por më së shumti më kujtohet portreti që kam bërë para 3 viteve, kur pikturoja një fëmijë 2-3 vjeçar i cili nuk qëndronte dot në karrige dhe unë me tablo në dorë e pikturoja duke ecur pas tij, në lëvizje!

Tashmë Saranda, pas gjithë këtyre vitesh, është bërë për të shtëpia e tij dhe shprehet se i mjafton të fitojë nga puna e tij aq sa për t’i siguruar jetesën aty.

Nëse do të dëshironit dhe ju një portret nga duart e arta të z. Rifat do të ishte më mirë t’i bënit një vizitë në shëtitoren e Sarandës, pasi ai kryesisht punon live për shkak se ka liri më të madhe në vija dhe ngjyra, piktura është më dinamike dhe piktori e kap më mirë karakterin e klientit, ndryshe nga fotografia e cila të kufizon sepse është statike.

Një xhiro në mbrëmje në shëtitoren e Sarandës, buzë detit, me pamjen e mrekullueshme që deti Jon ofron, duke marrë me vete një kujtim të përjetshëm nga aty, portretin tuaj të buzëqeshur të vulosur në një tablo./ProBizz.al/

Të Fundit

spot_img
Veza Rea'sspot_img