Sipas një studimi, ndryshimet klimatike janë shkaku kryesor për një thatësirë rekord në pyllin tropikal të Amazonës që ka tharë lumenjtë, ka vrarë delfinët dhe ka shkatërruar jetën e miliona njerëzve në rajon.
Ngrohja globale e bëri thatësirën 30 herë më të mundshme, shkaktoi temperatura ekstreme të larta dhe kontribuoi në uljen e reshjeve, sipas analizës nga World Weather Attribution, një grup ndërkombëtar shkencëtarësh. Studimi u fokusua në periudhën qershor-nëntor të vitit të kaluar.
Thatësira që goditi të nëntë vendet e pyjeve tropikale të Amazonës përfshirë Brazilin, Kolumbinë, Venezuelën dhe Perunë pritet të përkeqësohet në vitin 2024 pasi sezoni i shirave të fillojë të zvogëlohet në maj, thanë shkencëtarët për Reuters vitin e kaluar.
Mbrojtja e Amazonës konsiderohet jetike për frenimin e ndryshimeve klimatike për shkak të sasive të mëdha të gazit serrë që thithin pemët e tij. “Ne duhet të shqetësohemi vërtet me shëndetin e pyllit të Amazonës”, u shpreh Regina Rodrigues, një bashkëautore e studimit dhe studiuese në Universitetin Federal të Santa Catarina në Brazil.
Studiuesit kanë thënë se thatësira mund të përkeqësojë zjarret pyjore, të cilat kur shoqërohen me ndryshimet klimatike dhe shpyllëzimin mund ta shtyjnë Amazonën më shpejt drejt një pike pa kthim.
“Ndërsa rajoni është përballur me të paktën tre thatësira të tjera intensive në 20 vitet e fundit, shtrirja e kësaj thatësire ishte e paprecedentë dhe preku të gjithë pellgun e Amazonës”, tha Rodrigues.
Studiuesit në Brazil kanë thënë se nivelet e ulëta të ujit dhe temperaturat e larta çuan në vdekjen e të paktën 178 delfinëve rozë dhe gri të lumit Amazon vitin e kaluar. Mijëra peshq kanë ngordhur gjithashtu për shkak të niveleve të ulëta të oksigjenit në Amazonë.
Përkthyer dhe përshtatur nga Reuters për Probizz.al
