Tregu global i punës mund të tronditet në pesë vitet e ardhshme për shkak se ekonomitë botërore po dobësohen dhe kompanitë po shkojnë drejt adaptimit të teknologjive të tilla si inteligjenca artificiale.
Zbulimi është bërë nga Forumi Ekonomik Botëror , i cili të dielën publikoi edhe një raport bazuar në anketat e më shumë se 800 kompanive.
WEF – e cila organizon një mbledhje të liderëve globalë në Davos, Zvicër, çdo vit bëri me dije se punëdhënësit presin të krijojnë 69 milionë vende të reja pune deri në vitin 2027 dhe të eliminojnë 83 milionë pozicione. Kjo do të rezultojë në një humbje neto prej 14 milionë vendesh pune, ekuivalente me 2 % të punësimit aktual. Shumë faktorë do të ndikojnë në lëkundjen e tregut të punës gjatë asaj periudhe. Kalimi në sistemet e energjisë së rinovueshme do të jetë një motor i fuqishëm për gjenerimin e vendeve të punës, ndërsa rritja më e ngadaltë ekonomike dhe inflacioni i lartë do të sjellin humbje. Nxitimi për të vendosur inteligjencën artificiale, ndërkohë, do të shërbejë si një forcë pozitive dhe negative. Kompanitë do të kenë nevojë për punëtorë të rinj për t’i ndihmuar ata të zbatojnë dhe menaxhojnë mjetet e AI. Punësimi i analistëve dhe shkencëtarëve të të dhënave, specialistëve të mësimit të makinerive dhe ekspertëve të sigurisë kibernetike parashikohet të rritet mesatarisht 30 % deri në vitin 2027, sipas WEF.
Në të njëjtën kohë, përhapja e inteligjencës artificiale do të rrezikojë shumë role, pasi robotët zëvendësojnë njerëzit në disa raste. Mund të ketë 26 milionë më pak punë për mbajtjen e të dhënave dhe punë administrative deri në vitin 2027. Nëpunësit e futjes së të dhënave dhe sekretarët ekzekutivë pritet të shohin humbjet më të mëdha.
Pavarësisht ndjesisë së fundit rreth mjeteve si ChatGPT, automatizimi është zgjeruar ngadalë në fillim të kësaj dekade. Organizatat e anketuara nga WEF vlerësuan se 34 % e të gjitha detyrave të lidhura me biznesin aktualisht kryhen nga makineritë. Në vitin 2020, punëdhënësit mendonin se 47% e detyrave do të automatizoheshin deri në vitin 2025. Tani ata presin që ky numër të arrijë në 42 % deri në vitin 2027.
Ndërkohë, kompanitë po rimendojnë se cilat aftësi kanë nevojë për punonjësit e tyre. Firmat tani vlerësojnë “aftësinë për të përdorur në mënyrë efikase mjetet e AI” më shumë sesa programimin kompjuterik, sipas WEF.
https://edition.cnn.com/2023/04/30/business/automation-jobs-world-economic-forum/index.html
