OpenAI po përgatitet të hyjë në tregun e pajisjeve fizike dhe produkti i parë i kompanisë mund të jetë një pajisje inteligjente në formë unaze, me një çmim që pritet të variojë nga 300 deri në 400 dollarë.
Sipas informacioneve të publikuara nga Mark Gurman i Bloomberg, pajisja që OpenAI ka në zhvillim do të ketë një dizajn rrethor, afërsisht në përmasat e një disku hokeji. Ajo pritet të funksionojë me bateri dhe të jetë portative, në mënyrë që përdoruesit ta marrin lehtësisht me vete.
Burimet bëjnë të ditur se pajisja mund të përfshijë edhe komponentë që lëvizin vetë, një element që synon ta bëjë ndërveprimin më natyral dhe pajisjen më “të gjallë” gjatë përdorimit. Edhe pse ky produkt i parë nuk pritet të ketë ekran, ai thuhet se do të pajiset me një sistem kamerash dhe sensorësh të aftë të monitorojnë mjedisin përreth. Kjo sugjeron se pajisja mund të mbështetet fort te inteligjenca artificiale për të kuptuar kontekstin, ambientin dhe nevojat e përdoruesit.
Lëvizja e OpenAI drejt hardware-it vjen pasi kompania bleu për 6.5 miliardë dollarë startup-in io, të drejtuar nga ish-kreu i dizajnit të Apple, Jony Ive. Kjo marrëveshje shihet si një pjesë kyçe e strategjisë së OpenAI për të krijuar një kategori të re pajisjesh të ndërtuara që në themel rreth Inteligjencës Artificiale.
Por çmimi i mundshëm prej 300–400 dollarësh do ta vendoste produktin dukshëm mbi shumicën e altoparlantëve inteligjentë që ekzistojnë sot në treg, përfshirë edhe disa prej modeleve premium.
Kjo e bën strategjinë e çmimit një nga pikëpyetjet më të mëdha rreth produktit. OpenAI po përpiqet të krijojë një pajisje që nuk do të jetë thjesht një tjetër smart speaker, por një mënyrë të re për të ndërvepruar me inteligjencën artificiale në jetën e përditshme. Megjithatë, mbetet për t’u parë nëse konsumatorët do të jenë të gatshëm të paguajnë një çmim relativisht të lartë për një kategori produkti që ende nuk e njohin mirë.
Lançimi i pajisjes pritet të ndodhë gjatë vitit 2027, çka i jep OpenAI ende kohë për të rishikuar strategjinë e çmimit dhe konfigurimin përfundimtar të produktit.
Nëse raportimet konfirmohen, kjo pajisje mund të shënojë një nga hapat më të rëndësishëm të OpenAI përtej software-it, duke e çuar kompaninë nga ChatGPT dhe modelet e inteligjencës artificiale drejt një ekosistemi ku AI është e pranishme edhe përmes pajisjeve fizike.
