Kompania daneze e bizhuterive Pandora ka njoftuar se do të nisë kalimin nga argjendi te platini në disa prej linjave të saj të produkteve, si përgjigje ndaj rritjes së fortë të çmimit të argjendit në tregjet ndërkombëtare.
Gjatë vitit të fundit, çmimi i argjendit është më shumë se dyfishuar, ndërsa edhe metalet e tjera të çmuara kanë shënuar rritje të ndjeshme. Aktualisht, Pandora prodhon pjesën më të madhe të bizhuterive të saj nga argjendi, por kompania synon që deri në vitin 2028 ta përfundojë këtë tranzicion drejt përdorimit më të madh të platinës.
Sipas drejtuesve të kompanisë, objektivi nuk është që të gjitha bizhuteritë të jenë prej platini, por që argjendi të përfaqësojë rreth 25% të ofertës totale të produkteve. Kjo lëvizje synon të reduktojë varësinë e kompanisë nga një lëndë e parë e vetme, në një periudhë kur çmimet e metaleve janë të paqëndrueshme.
Drejtuesja ekzekutive e Pandora-s, Berta de Pablos-Barbier, është shprehur për Financial Times se është “zhgënjyese” që kompania perceptohet shpesh si një biznes i varur nga tregtimi i argjendit. Sipas saj, Pandora dëshiron të shkëputet nga imazhi i një marke të lidhur ngushtë me një metal të vetëm dhe të pozicionohet më fort si brand global bizhuterish.
Kompania thekson se platini ofron performancë më të mirë për përdorim të përditshëm krahasuar me argjendin dhe se testimet me konsumatorët kanë treguar një pranueshmëri të lartë për këtë metal më rezistent. Megjithatë, rritja e çmimit të argjendit ka pasur një ndikim të përkohshëm në fitimet e kompanisë, duke rritur kostot e prodhimit.
Pandora është e njohur globalisht për byzylykët e saj me “charms” dhe ka prani në qendra tregtare prestigjioze në shumë vende të botës.
Së fundmi, metalet e çmuara si ari dhe argjendi janë rritur në vlerë, pasi investitorët i shohin ato si strehë të sigurt në një periudhë pasigurie gjeopolitike. Megjithatë, çmimi i argjendit ndikohet edhe nga faktorë të tjerë, pasi ai përdoret gjerësisht në industri.
“Argjendi lidhet ngushtë me shëndetin e ekonomisë globale. Ai përdoret në prodhimin e pajisjeve elektronike dhe mjekësore, paneleve diellore dhe baterive, çka do të thotë se kërkesa për këtë metal ndryshon sipas ritmit të rritjes ekonomike globale,” shpjegon Danni Hewson, drejtuese e analizës financiare në AJ Bell.
Ajo shton se argjendi u shpall mineral kritik nga SHBA në fund të vitit të kaluar dhe se çmimi i tij u rrit ndjeshëm në janar, pasi Kina shtrëngoi kontrollet mbi eksportet, duke shtuar shqetësimet për furnizimet globale tashmë të kufizuara.
