Nga 1 tetori, nxënësit e 85 shkollave publike në Tiranë do të kenë mundësi të qëndrojnë në shkollë edhe pas përfundimit të mësimit, pa pagesë.
Programi i ri “Pas Shkolle” synon t’u ofrojë fëmijëve një mënyrë më të dobishme për të kaluar orët e pasdites. Përveç përfundimit të detyrave të shtëpisë dhe përforcimit të njohurive, nxënësit do të mund të angazhohen në aktivitete artistike, praktike dhe krijuese.
Në mesin e shkollave ku do të zbatohet programi janë “11 Qershori”, “28 Nëntori”, “7 Marsi”, “Avni Rustemi”, “Bajram Curri”, “Kosova”, “Nënë Tereza”, “Vaçe Zela” dhe “Gjergj Fishta”. Programi do të shtrihet edhe në gjimnaze, ku përfshihen “Sami Frashëri”, “Qemal Stafa”, “Petro Nini Luarasi”, “Partizani” dhe “Ismail Qemali”.
Për fëmijët e arsimit fillor do të ketë një hapësirë të posaçme për të bërë detyrat e shtëpisë, ku nxënësit do të mund të marrin ndihmë dhe të përforcojnë njohuritë e marra gjatë mësimit, nën kujdesin e mësuesve.
Por pasditja në shkollë nuk do të jetë vetëm për detyrat. Fëmijët do të kenë mundësi të zgjedhin edhe aktivitete të ndryshme, si muzika, teatri, arti pamor, kërcimi apo zejet.
Në varësi të orarit të mësimit, programi për nxënësit e ciklit fillor mund të vijojë deri rreth orës 15:00. Gjatë kësaj kohe parashikohet edhe një pushim për drekë, ndërsa ushqimi duhet të sigurohet nga vetë prindërit.
Pjesëmarrja në “Pas Shkolle” do të jetë vullnetare. Prindërit do të duhet të japin pëlqimin për regjistrimin e fëmijës, ndërsa shkollat do të organizojnë grupet në bazë të kërkesave dhe interesit të nxënësve.
Grupet pritet të kenë përgjithësisht 20 deri në 30 nxënës, ndërsa numri i tyre do të përshtatet sipas kapaciteteve të secilës shkollë.
Për shumë prindër që përballen çdo ditë me oraret e punës dhe kujdesin për fëmijët, programi mund të jetë një mundësi praktike, por edhe një mënyrë që koha pas mësimit të mos kalohet thjesht në shtëpi, por të shfrytëzohet për të mësuar, krijuar dhe zhvilluar aftësi të reja.
