Porti i Durrësit po shënon një rritje të ndjeshme të vizitave nga mjetet turistike, duke u kthyer gjithnjë e më shumë në një pikë të rëndësishme për turizmin detar në Shqipëri.
Gjatë muajit qershor, në port janë ankoruar 87 jahte turistike të madhësive të ndryshme dhe 3 kroçera me turistë të huaj, të cilët, përveç shërbimeve portuale, kanë vizituar edhe qendrat historike, muzeale dhe atraksionet kulturore të qytetit të Durrësit.
Sipas të dhënave të Autoritetit Portual Durrës, vetëm kroçerat që mbërritën gjatë muajit qershor sollën 938 turistë, kryesisht nga Shtetet e Bashkuara të Amerikës, Franca dhe Britania e Madhe.
Fluksi i mjeteve turistike pritet të rritet edhe më tej gjatë muajve korrik dhe gusht, pasi kalata 4 është vënë në dispozicion të jahteve dhe mjeteve të tjera turistike. Vetëm më 2 korrik, në kalatën qendrore të portit u ankoruan shtatë jahte turistike, duke dëshmuar interesin në rritje për këtë destinacion.
Edhe pse funksioni kryesor i Portit të Durrësit mbetet përpunimi i anijeve tregtare, Autoriteti Portual ka investuar në krijimin e kushteve për akomodimin disaditor të mjeteve turistike, duke kontribuar në zhvillimin e turizmit detar dhe promovimin e qytetit antik si një destinacion tërheqës për vizitorët ndërkombëtarë.
