Shqipëria ka qenë një nga vendet që ka përfituar më shumë nga rritja e trafikut ajror gjatë verës së vitit 2026. Në një sezon të shoqëruar me pasiguri dhe ndryshime të rëndësishme në hapësirën ajrore për shkak të krizës në Lindjen e Mesme, numri i fluturimeve drejt dhe nga vendi ynë ka vijuar të rritet me ritme të forta.
Të dhënat e Eurocontrol, të konsultuara nga ekofin.al, tregojnë se Shqipëria ishte pjesë e grupit të vendeve të Evropës Juglindore ku trafiku ajror u rrit ndjeshëm gjatë muajve të verës. Në të njëjtën kohë, disa vende të tjera të rajonit, si Bullgaria, Hungaria, Rumania dhe Turqia, regjistruan rënie të trafikut si pasojë e ndikimit të krizës në Lindjen e Mesme.
Rritje e fortë e fluturimeve u vu re edhe në Kroaci, Qipro, Greqi, Mal të Zi, Maqedoni të Veriut, Serbi dhe Slloveni. Tendenca ishte e dukshme që në javët e para të qershorit dhe vazhdoi përgjatë gjithë sezonit veror.
Në nivel evropian, vera e vitit 2026 rezultoi një periudhë rekord për aviacionin. Nga 1 qershori deri më 31 gusht, në rrjetin evropian u regjistruan mesatarisht 35,959 fluturime në ditë, 2.4% më shumë se në të njëjtën periudhë të vitit 2025.
Një tjetër rekord u shënua më 10 korrik, kur në hapësirën ajrore evropiane u regjistruan 37,640 fluturime brenda një dite. Në total, gjatë verës u thyen 66 rekorde ditore të trafikut nga kompani ajrore, aeroporte, qendra të kontrollit ajror dhe shtete.
Por ajo që bie në sy është se rritja e numrit të fluturimeve nuk u shoqërua me një përkeqësim të përgjithshëm të performancës së rrjetit. Vonesat e lidhura me menaxhimin e trafikut ajror ranë me 17%, duke zbritur në një mesatare prej 3.27 minutash për fluturim.
Edhe përpikëria shënoi përmirësim. Rreth 72.6% e fluturimeve mbërritën në kohë, 1.2 pikë përqindjeje më shumë krahasuar me verën e vitit të kaluar. Megjithatë, volumi i lartë i trafikut vijoi të krijonte presion mbi sistemin, pasi rreth 681 mijë fluturime, ose 21% e totalit, u prekën nga kufizimet e menaxhimit të trafikut.
Për Shqipërinë, këto shifra vijnë në një moment kur vendi po përjeton një zgjerim të shpejtë të lidhjeve ajrore dhe një rritje të vazhdueshme të numrit të udhëtarëve. Aeroporti dhe destinacionet turistike shqiptare janë kthyer gjithnjë e më shumë në pjesë të rëndësishme të hartës turistike të rajonit.
Në fakt, kjo nuk është hera e parë që Shqipëria shfaqet ndër tregjet me rritjen më të shpejtë të trafikut ajror. Edhe gjatë verës së vitit 2025, Eurocontrol e renditi vendin ndër tregjet e Evropës Juglindore që kishin shënuar rritje mbi 5% të trafikut krahasuar me një vit më parë.
Shifrat e verës së këtij viti tregojnë se interesi për Shqipërinë nuk duket të jetë thjesht një fenomen i momentit. Në një kohë kur lëvizjet e avionëve në disa vende të rajonit u ngadalësuan, Shqipëria vazhdoi të tërheqë më shumë fluturime, më shumë udhëtarë dhe gjithnjë e më shumë vëmendje në hartën turistike evropiane./ekofin
