Një rishikim i gjerë shkencor ka ngritur alarmin për ndikimin që pajisjet elektronike mund të kenë në zhvillimin e foshnjave dhe fëmijëve nën moshën dy vjeç. Studiuesit paralajmërojnë se ekspozimi i hershëm ndaj ekraneve të telefonave inteligjentë, tabletëve dhe pajisjeve të tjera teknologjike lidhet me një sërë pasojash negative për shëndetin dhe zhvillimin e tyre.
Sipas analizës, sa më shumë kohë që fëmijët e kësaj grupmoshe kalojnë para ekraneve, aq më i madh është rreziku për probleme në zhvillimin fizik, emocional dhe njohës. Për këtë arsye, autorët e studimit rekomandojnë që fëmijët nën dy vjeç të mos përdorin pajisje me ekran, përveç rasteve kur ato shfrytëzohen në aktivitete të përbashkëta me prindërit që nxisin komunikimin, ndërveprimin dhe krijimin e lidhjeve emocionale.
Rafe Clayton, pedagoge për komunikim në Universitetin e Leedsit, theksoi se mungesa e udhëzimeve të qarta për prindërit po ndikon në krijimin e zakoneve të pashëndetshme tek fëmijët.
“Ky është një realitet që duhet të ndryshojë,” është shprehur ai.
Studimi, i cilësuar si më gjithëpërfshirësi i realizuar deri më tani mbi këtë temë, u bën thirrje autoriteteve shëndetësore të rishikojnë rekomandimet ekzistuese për kohën që fëmijët nën moshën pesë vjeç mund të kalojnë para ekraneve.
Gjetjet tregojnë se përdorimi i pajisjeve elektronike në moshë shumë të hershme mund të ndikojë negativisht në cilësinë e gjumit, të dëmtojë shëndetin e syve dhe të rrisë rrezikun për mbipeshë dhe obezitet.
Një tjetër shqetësim i ngritur nga studiuesit është fakti se shumë fëmijë po përdorin ekranet si mjet qetësimi, duke zëvendësuar ndërveprimin me prindërit. Kjo, sipas tyre, mund të dobësojë lidhjen emocionale mes prindërve dhe fëmijëve, si edhe të ndikojë në zhvillimin e aftësive gjuhësore dhe komunikimit.
Hulumtimi është realizuar nga studiues të katër universiteteve në Mbretërinë e Bashkuar, të cilët bëjnë thirrje për kërkime të mëtejshme mbi ndikimin afatgjatë të teknologjisë tek fëmijët e vegjël, në një kohë kur përdorimi i pajisjeve inteligjente po bëhet gjithnjë e më i zakonshëm në jetën e përditshme.
