Konferenca rajonale e marketingut digjital, inovacionit dhe teknologjisë, AllWeb, rikthehet në Tiranë më 6 nëntor 2026, duke premtuar edhe këtë vit një program të pasur me folës ndërkombëtarë, histori frymëzuese dhe diskutime mbi tendencat që po transformojnë biznesin dhe komunikimin.
AllWeb prezanton dy emrat e parë të konferencës së këtij viti: sipërmarrësin serb Ivan Minić dhe ekspertin hungarez të Inteligjencës Artificiale dhe prodhimit digjital, Dr. Péter Szántó. Dy profile të ndryshme, por të bashkuara nga një element i përbashkët: aftësia për të identifikuar ndryshimet e mëdha dhe për t’i kthyer ato në mundësi reale për bizneset dhe profesionistët.
Ivan Minić – Një nga zërat më të njohur të sipërmarrjes digjitale në rajon
Për më shumë se dy dekada, Ivan Minić ka ndërtuar një karrierë në kryqëzimin mes teknologjisë, marketingut dhe sipërmarrjes. Ai është themelues i disa nismave të suksesshme si Burek.com, MojaPijaca.rs, TurnKey, DigiTalk dhe podcastit të njohur Pojačalo, i cili është kthyer në një nga platformat më të rëndësishme të edukimit dhe frymëzimit për sipërmarrësit në Ballkan. Gjatë karrierës së tij, Minić ka këshilluar kompani ndërkombëtare për praninë e tyre digjitale në tregjet lokale, ndërsa sot fokusohet kryesisht në mentorimin e sipërmarrësve, zhvillimin e bizneseve të vogla dhe të mesme, si dhe në krijimin e përmbajtjeve që ndihmojnë individët të ndërtojnë dhe zhvillojnë karrierat e tyre.
Ekspertiza e tij shtrihet në fusha si inovacioni, marketingu, zhvillimi personal, neurodiversiteti dhe sipërmarrja, ndërsa në vitet e fundit ka kontribuar si konsulent dhe ekspert në projekte të mbështetura nga organizata ndërkombëtare si USAID, UNDP, UNICEF, OSBE, Banka Botërore dhe Thomson Foundation. Në AllWeb 2026, Ivan Minić pritet të ndajë përvojat e tij mbi ndërtimin e komuniteteve, fuqinë e përmbajtjes autentike dhe sfidat e sipërmarrjes në një epokë të dominuar nga teknologjia.
Folësi i dytë i konfirmuar është Dr. Péter Szántó, bashkëthemelues dhe Chief Production Officer i reel8, një shtëpi moderne prodhimi digjital dhe AI. Ai rikthehet përsëri si folës në konferencën AllWeb. I njohur si një nga figurat më aktive në ekosistemin e inovacionit në Hungari, Szántó është pjesë e listës Forbes 30 Under 30, autor, tre herë folës në TEDx dhe ekspert ndërkombëtar i brandingut dhe teknologjive të reja. Karriera e tij përfshin bashkëpunime me kompani dhe organizata të njohura si MasterCard, Tesco, Ogilvy, ProSiebenSat.1, Furla dhe OTP Bank, ndërsa ka qenë i ftuar si folës në skena prestigjioze si SXSW, Lean Startup Conference, Business of Software, Wolves Summit dhe Brain Bar.
Në Tiranë, ai do të prezantojë temën: “AI Transformed Content Creation – You’ll Lose If You Don’t Follow!” Përpara prezantimit kryesor, pjesëmarrësit do të kenë mundësinë të ndjekin një premierë 10-minutëshe të një filmi të shkurtër të realizuar me inteligjencë artificiale. Gjatë prezantimit, Szántó do të tregojë sesi inteligjenca artificiale po transformon të gjithë ciklin e prodhimit audioviziv, nga ndërtimi i narrativës dhe skenarit, deri te krijimi i imazheve hiperrealiste, zërave sintetikë me emocione dhe menaxhimi i një pipeline profesional prodhimi me një ekip shumë më të vogël se ai i një studioje tradicionale.
Pjesëmarrësit do të njihen me mjetet më të avancuara të momentit, praktikat më të mira të prompt engineering dhe proceset që po i lejojnë krijuesit e përmbajtjes të prodhojnë më shpejt, më zgjuar dhe me ambicie shumë më të mëdha se më parë.
Me mbi 3,500 pjesëmarrës, qindra folës ndër vite dhe një komunitet në rritje profesionistësh, sipërmarrësish, marketerësh dhe inovatorësh, AllWeb është konsoliduar si një nga ngjarjet më të rëndësishme të marketingut digjital në rajon. Edicioni i vitit 2026 do të zhvillohet më 6 nëntor në Tiranë dhe do të sjellë diskutime mbi inteligjencën artificiale, marketingun, krijimin e përmbajtjes, inovacionin dhe të ardhmen e biznesit në një ekonomi gjithnjë e më të drejtuar nga teknologjia. Informacione të mëtejshme mbi programin dhe folësit e tjerë do të publikohen në javët në vijim./Businessmag
