Universiteti Bujqësor i Tiranës hedh një hap tjetër të rëndësishëm në forcimin e rolit të tij si ofrues i shërbimeve të konsulencës në dobi të institucioneve e aktorëvë qëndrore dhe lokalë. Marrëveshja e firmosur nga rektori i UBT, Prof.Dr. Fatbardh Sallaku dhe Ministri i Shtetit për Pushtetin Vendor Arbjan Mazniku e shndërron UBT në institucionin e referencës për ofrimin e këshillimit në hartimin e projekteve dhe ofrimin e trajnimeve për institucionet dhe administratën vendore.
Nëpërmjet kësaj marrëveshje e cila do të vihet në jetë në vitin 2025 , pushteti vendor do të ketë këshillim nga ekspertët më të mirë të Universitetit Bujqësor në fushën e bujqësise , zhvillimit rural dhe mbrojtjes së pyjeve.
UBT do të ndihmojë bashkitë në hartimin e rreth 30 projekteve të para-fizibilitetit , do të ofrojë asistencë praktike në terren për bashkitë me profil bujqësor e rural , si edhe do t’I bashkëshoqërojë në rrugëtimin drejt BE-së.
Po ashtu, do të mundësojë edhe asistencë teknike për identifikimin e faktorëve që rrisin prodhimin bujqësor dhe forcojnë pozitën e tyre në tregjet e brendshme dhe të eksportit.
Kjo marrëveshje është një tjetër dëshmi e rëndësisë që UBT i jep funksionit të tretë të tij, atë të transferimit të teknologjive të reja dhe know how.
