Vendet më të stresuara për rritjet e çmimeve gjatë Krishtlindjeve

Rritjet e çmimeve po u shkaktojnë njerëzve stres të shtuar në prag të Krishtlindjeve, sipas një sondazhi të ri.

  • Mesatarisht, gati nëntë në dhjetë të anketuar në një sondazh të Ipsos thanë se ndihen të stresuar për shkak të ndikimit të rritjes së çmimeve.
  • Rumunët janë më të stresuarit, me 74% të të anketuarve që e deklarojnë këtë, ndërsa brazilianët janë më pak të shqetësuarit, me vetëm 28% që deklarojnë se ndihen të stresuar.

Për shumë persona, këto Krishtlindje do të mbahen mend jo vetëm nga një rikthim tentativ në normalitet pas lehtësimit të kufizimeve të Covid në mbarë botën, por edhe nga rritja e përgjithshme e çmimeve, e cila padyshim do të ndikojë në blerjet dhe festimet e këtij fundviti.

Sipas një studimi të Ipsos të kryer në 12 vende, mesatarisht 85 për qind e të anketuarve deklaruan se ndihen të emocionuar për festimet e fundvitit, madje një e treta e tyre thonë se janë edhe më të emocionuar se vitin e kaluar.

Por, në të njëjtën kohë, ky entuziazëm po bie ndesh me nivelet e stresit që po përjetojnë të anketuarit, në kushtet e inflacionit aktual që ka arritur shifra të larta.

Mesatarisht, gati nëntë në dhjetë të anketuar thanë se ndihen të stresuar për shkak të ndikimit të rritjes së çmimeve, ndërsa 55 për qind thanë se janë më të stresuar se vitin e kaluar.

Siç tregon grafiku i mëposhtëm, stresi është më i përhapur në Rumani, ku tre të katërtat (74 për qind) e të anketuarve në këtë vend thanë se, për shkak të rritjes së çmimeve, ata ndihen më të stresuar këtë vit për festimet e fundvitit dhe të Krishtlindjeve, sesa në vitin 2021.

Edhe pse përqindja e njerëzve që deklarojnë se janë më të stresuar këtë vit mbetet e lartë në Shtetet e Bashkuara, ajo është disi më e ulët, në nivelin e 50 për qind, ndërsa Brazili ka shifrën më të ulët mes të gjitha shteteve të marra në analizë, me vetëm 28 për qind.

Shqetësimet financiare do të ndikojnë padyshim mënyrën se si do të duken Krishtlindjet për shumë njerëz këtë vit, pasi, mesatarisht në nivel global, gjysma e të anketuarve presin që rritja e kostove të ketë një ndikim të rëndësishëm në blerjet e tyre për festat e fundvitit, ndërsa 40 përqind thonë të njëjtën gjë për përgatitjet e tyre për këto festa.

Burimi: Statista