Dhjetë kompani nga Kosova do të prezantojnë produktet dhe shërbimet e tyre në panairin e biznesit dhe karrierës për gratë ndërmarrëse “She Leads 2026”, i cili do të mbahet më 13 qershor në Zvicër, shkruan albinfo.ch.
Panairi organizohet nga platforma mediale albinfo.ch, në bashkëpunim me dy sipërmarrëset shqiptaro-zvicerane Lume Deari dhe Ganimet Bilalli, me synimin për të krijuar një platformë të fuqishme rrjetëzimi, promovimi dhe bashkëpunimi për gratë në biznes nga Zvicra, Kosova, Shqipëria dhe Maqedonia e Veriut.
Pjesëmarrja e Kosovës në këtë ngjarje të rëndësishme është organizuar nga Ministria e Industrisë, Ndërmarrësisë, Tregtisë dhe Inovacionit (MINTI), përmes Agjencisë për Investime dhe Përkrahjen e Ndërmarrjeve në Kosovë (KIESA), e cila ka siguruar hapësirën ekspozuese për prezantimin e kompanive kosovare.
Në edicionin e sivjetmë të panairit, Kosova do të përfaqësohet nga dhjetë kompani:
- Perfect Paper Cups L.L.C.
- Bliff Organik Sh.P.K.
- Bronte Sh.P.K.
- BKM AgroKrusha Sh.P.K.
- Mendje Sh.P.K.
- Eris Production Sh.P.K.
- Dija Fashion Sh.P.K.
- Novaza L.L.C.
- A&A Project Group Sh.P.K.
- Green Life Natural Products Sh.P.K.
Përmes pjesëmarrjes në “She Leads 2026”, këto kompani do të kenë mundësinë të prezantojnë produktet dhe shërbimet e tyre para një audience të gjerë biznesesh, investitorësh dhe profesionistësh nga Zvicra dhe rajoni, duke promovuar potencialin ekonomik të Kosovës dhe duke krijuar ura të reja bashkëpunimi.
“She Leads 2026” pritet të mbledhë deri në 1.000 vizitorë, ndërsa programi do të përfshijë panele diskutimi, rrëfime suksesi, ligjërata frymëzuese dhe aktivitete të shumta rrjetëzimi.
Ngjarja do të mbahet në ambientet e kompanisë AMAG në Fislisbach, pranë Cyrihut, duke sjellë së bashku gra sipërmarrëse, profesioniste dhe lidere nga hapësira shqiptare dhe diaspora.
Të gjitha informatat i gjeni këtu: sheleadsevent
Marrë nga Albinfo.Ch
