Një histori tjetër frymëzuese vjen nga SHBA. Bëhet fjalë për Diamant Hysenaj, shqiptari nga Kosova që ka shpallur kandidaturën për Kongresin Amerikan. Pretendent për t’u bërë zëri i shqiptarëve, ai u largua shumë herët nga Kosova.
I vendosur në Bronx (SHBA) aty ku filloi gjithçka nga e para me qëllimin e vetëm për të çuar përpara ëndrrat dhe vizionin e tij.
Hysenaj zotëron një kompani ndërtimi dhe menaxhon prona me vlerë qindra milionë dollarë. Diamant Hysenaj është zyrtarisht kandidat për nominimin e Partisë Republikane për Distriktin e 14-të në New York duke sfiduar përfaqësuesen aktuale, Alexandria Ocasio-Cortez (AOC).
Në intervistat për mediat amerikane, Hysenaj ka deklaruar se përvoja e tij si emigrant dhe si dikush që filloi nga zeroja duke punuar fort për të arritur sukses është ajo që e bën të përshtatshëm për të përfaqësuar një zonë me shumë emigrantë si NY-14.
Ai ka premtuar se do të punojë për sigurinë publike, për reforma në sistemin e imigracionit, për uljen e kostove të banimit dhe taksave, për mbështetje të biznesit dhe për përmirësim infrastrukture duke kritikuar politikën e AOC-s.
Pas shpalljes së kandidaturës, Hysenaj u përshëndet dhe u përgëzua nga figura të komunitetit shqiptar përfshirë edhe nga Përparim Rama, kryetar i komunës së Prishtinës, i cili përmendi se rrugëtimi i Hysenajt nga Gjakova deri në garë për Kongres është frymëzim për shumë të rinj dhe për gjithë komunitetin shqiptar të SHBA-ve.
Diaspora e vlerëson kandidaturën e tij si një mundësi për komunitetet emigrante veçanërisht për shqiptarët nga Kosova dhe Ballkani që të kenë përfaqësim më të drejtpërdrejtë në politikën amerikane. Diamant Hysenaj shihet si zëri i emigrantëve dhe të punësimit, me premtime për t’u fokusuar në temat që prekin komunitetet e lagjeve të Bronx-it dhe Queens si kostoja e jetesës, siguria, mundësi pune, dhe reforma imigracioni.
Distrikti në të cilin garon historikisht është bastion i votuesve demokratë, dhe përfaqësohet prej kohësh nga AOC, e njohur për mbështetjen e politikave progresive. Kjo e bën fitoren si republikan për Hysenajn një sfidë të madhe.
