Kanadaja dhe Danimarka më në fund i dhanë fund “luftës” së tyre prej dekadash të martën.
Të dy vendet nënshkruan zyrtarisht një marrëveshje për të ndarë ishullin Hans në Grenlandën veriperëndimore, duke krijuar kufirin e parë tokësor midis Kanadasë dhe Evropës, në një ceremoni në Otava ku morën pjesë ministrja e jashtme kanadeze dhe homologu i saj danez.
Mosmarrëveshja, e cila ka qenë në një ngërç për 49 vjet, do të shohë ishullin në formë veshkash të ndarë në dysh dhe marrëveshja midis Otavës dhe Kopenhagës do të mbahet si një model për zgjidhjen e mosmarrëveshjeve territoriale në mbarë botën.
“Arktiku shërben si një fener i bashkëpunimit ndërkombëtar, ku sundimi i ligjit mbizotëron”, tha Ministrja e Jashtme kanadeze Mélanie Joly.
“Në një kohë kur siguria globale është e kërcënuar, nuk ka qenë kurrë më e rëndësishme për demokracitë si Kanadaja dhe Danimarka të punojnë së bashku, përkrah popujve indigjenë, për të zgjidhur mosmarrëveshjet tona në përputhje me ligjin ndërkombëtar”, shtoi ajo.
Në një konferencë për shtyp me Ministrin e Jashtëm danez Jeppe Kofod, ajo theksoi se konflikti – “të cilin shumë e kanë quajtur “lufta e uiskit” – ishte “më miqësorja nga të gjitha luftërat”.
Kofod tha se zgjidhja e konfliktit erdhi në një kohë kur “rendi ndërkombëtar i bazuar në ligj është nën presion“, dhe vlerat demokratike janë “nën sulm”, duke iu referuar luftës në Ukrainë.
“Në të kundërt, ne kemi treguar se si mosmarrëveshjet e gjata mund të zgjidhen në mënyrë paqësore duke ndjekur rregullat,” tha ai, duke shtuar se ai shpresonte “të frymëzonte vendet e tjera që të ndiqnin të njëjtën rrugë”.
Ishulli Hans, i cili mbulon 1.3 kilometra katrorë, ndodhet midis ishullit Ellesmere në veri të Kanadasë dhe Grenlandës, një territor danez. Mosmarrëveshja daton që nga viti 1973 kur u vendos një kufi detar midis dy vendeve.
Burimi: Euronews
