Zhvillohet finalja e Konkursit Ndërkombëtar për projektin e EXPO ALBANIA, ku 5 skuadra me prestigj në botën e arkitekturës bashkëkohore, të përzgjedhura mes afro 60 konkurentësh nga e gjithë bota, do të prezantojnë koncept idetë e tyre për një qendër shumëfunksionale. Ministri i Ekonomisë, Kulturës dhe Inovacionit, Blendi Gonxhja deklaroi se “EXPO Albania” do të jetë një destinacion për organizimin e panaireve, ekspozitave të artit, kulturës, historisë, konferencave e takimeve të shumëllojshme, duke krijuar një ofertë të re për “Shqipërinë 2030”.

Sipas tij Shqipëria do të kthehet në një lider në rajon sa i takon qendrës së panaireve .

“EXPO Albania do të plotësojë mungesën që Tirana ka që është të pasurit e një destinacioni që të bëjë të mundur të jemi lider në rajon në aspektin e panaireve e aktiviteteve e ngjarjeve të mëdha që kanë të bëjnë me një publik që është i gjerë”, tha ministri.

Në finalen e konkursit ndërkombëtar për projektin e “EXPO ALBANIA”, u prezantuan 5 skuadra në botën e arkitekturës bashkëkohore, dy studio të arkitektëve amerikanë Steven Hall dhe Jeanne Gang, studio gjermane Kuehn Malvezzi, skuadra belge e Office KGDV dhe studio italiane edhe në Shqipëri e Stefano Boerit.