Arti si mesazh, ndjenjë dhe kërkim i së pathënës
Në Shkup u çel ekspozita personale e mjeshtrit shqiptar të mozaikut, Saimir Strati, artisti i njohur ndërkombëtarisht dhe mbajtës i 11 Rekordeve Guinness.
Nën titullin “Mesazh në shishe”, ekspozita sjell një qasje të veçantë ndaj artit, ku materiale të pazakonta nga gozhdët dhe kokrrat e kafesë te gjethet dhe gurët dalin nga funksioni i tyre i zakonshëm dhe shndërrohen në vepra që mbartin identitet, simbolikë dhe mesazh.
Në krijimtarinë e Stratit, materiali nuk është thjesht mjet realizimi. Ai bëhet pjesë e rrëfimit artistik dhe e mënyrës se si artisti komunikon me publikun. Për Stratin, arti lind nga liria krijuese, përkushtimi dhe, mbi të gjitha, nga ndjenja njerëzore.
Ekspozita sjell gjithashtu në vëmendje një nga debatet më aktuale të kohës: raportin mes artit dhe inteligjencës artificiale. Në një realitet ku teknologjia po fiton gjithnjë e më shumë hapësirë në proceset krijuese, Strati e sheh atë si një mjet që mund t’i shërbejë artistit, por jo si një zëvendësim të emocionit, intuitës dhe përjetimit njerëzor.
Ideja, përpara se të mbërrijë te dora e artistit, duhet të kalojë përmes zemrës.
Krahas “Mesazh në shishe”, në të njëjtën hapësirë artistike prezantohet edhe ekspozita “Inspirim”, e cila e fton publikun drejt një tjetër dimensioni të artit, të lidhur me kujtesën, natyrën, emocionin dhe përvojën njerëzore.
Ai thekson se arti nuk është vetëm ajo që shohim. Është ajo që ndiejmë, ajo që na prek dhe ajo që vazhdojmë ta mbajmë me vete edhe pasi largohemi nga vepra.
