Qytetarët që janë pajisur me një Akt të Marrjes së Tokës në Pronësi (AMTP) dhe kërkojnë regjistrimin e tij duhet të plotësojnë paraprakisht një sërë dokumentesh. Agjencia Shtetërore e Kadastrës ka publikuar një sqarim mbi dokumentacionin që duhet të disponojnë përfituesit, si dhe procedurën që ndiqet pas aplikimit.
Sipas Kadastrës, dokumenti kryesor është akti origjinal i AMTP-së, i cili duhet të shoqërohet me planin e rilevimit të sipërfaqes së tokës së përfituar, të hartuar sipas standardit të miratuar me vendim të Këshillit të Ministrave.
Pjesë e dokumentacionit është edhe certifikata e gjendjes familjare, ndërsa kërkesat ndryshojnë në varësi të kategorisë së familjes përfituese.
Për familjet që kanë përfituar tokë nga ish-kooperativat bujqësore kërkohet certifikata e gjendjes familjare e datës 1 gusht 1991, si dhe certifikata e momentit kur kryhet regjistrimi.
Ndërsa për familjet që kanë përfituar tokë nga ish-ndërmarrjet bujqësore kërkohet certifikata e datës 1 gusht 1991, me ndryshimet deri më 1 tetor 1992, si dhe certifikata e gjendjes familjare në momentin e regjistrimit.
Një dokumentacion shtesë kërkohet për familjet që kanë përfituar tokë, pronësia e së cilës u është hequr më parë. Në këto raste duhet të paraqitet vërtetim, akt apo dokument tjetër zyrtar që provon pronësinë e tokës para vitit 1946, si dhe dëshmia e trashëgimisë, kur kjo është e nevojshme.
Qytetarët duhet gjithashtu të disponojnë vërtetimin e pagesës së taksave vendore.
Kadastra nënvizon edhe një kusht të rëndësishëm për regjistrimin: përfituesi nuk duhet të ketë marrë tokë bujqësore në territorin e një ish-kooperative apo ish-ndërmarrjeje bujqësore tjetër, të ndryshme nga ajo ku ndodhet toka për të cilën kërkohet regjistrimi.
Pas dorëzimit të aplikimit, drejtoria vendore e Kadastrës kryen verifikimet përkatëse për të vlerësuar mundësinë e regjistrimit të ngastrave. Verifikimi bëhet duke krahasuar informacionin që gjendet në dokumentacionin e disponueshëm për pasurinë me gjendjen faktike të saj në terren.
Sa i përket mënyrës së dorëzimit, dokumentacioni i përgatitur duhet të ngarkohet në format PDF gjatë aplikimit, ndërsa kopjet origjinale duhet të dërgohen me postë pranë Drejtorisë Vendore të Kadastrës që administron zonën ku ndodhet pasuria.
Sqarimi synon të shmangë aplikimet me dokumentacion të paplotë dhe t’u bëjë të qartë qytetarëve se cilat dokumente duhet të sigurojnë përpara nisjes së procedurës së regjistrimit të AMTP-së. /ekofin.al
