Një nga destinacionet kryesore turistike të Spanjës ka vendosur të ndalojë marrjen me qira të apartamenteve për turistët në një përpjekje për të përmirësuar strehimin për banorët vendas.
Këshilli i qytetit të Barcelonës ka njoftuar një plan radikal për ti hequr qytetit rreth 10,000 licencat e banesave turistike gjatë pesë viteve të ardhshme.
Masa synon të trajtojë krizën në rritje të strehimit, e cila është veçanërisht e problematike në qytetet turistike si Barcelona.
Plani pasqyron një prirje globale të qyteteve që fillojnë të luftojnë efektet e turizmit masiv në jetën lokale.
Vendimi u jep autoriteteve të qytetit katalanas fuqinë për të rregulluar banesat turistike në komunat e tyre. Barcelona nuk ka dhënë licenca të reja që nga viti 2014.
Qyteti ka përjetuar rritje të mëdha në qiratë e banesave pasi oferta e banesave për banorët vendas ka rënë në dekadën e fundit.
Jaume Collboni, kryetari i bashkisë së qytetit, i përshkroi masat si “një pikë kthese” në trajtimin e problemit të strehimit, veçanërisht për të rinjtë. Ai pranoi se rezultatet nuk do të jenë të menjëhershme, por beson se do të hapin një debat politik dhe social.
“Ne duam të garantojmë të drejtën për të jetuar në Barcelonë dhe të përballemi në mënyrë efektive me krizën e strehimit që kemi vuajtur prej vitesh”, shkroi ai në Twitter.
Ndërkohë nënkryetarja e bashkisë, Laia Bonet, deklaroi se periudha pesëvjeçare para përfundimit të licencave do të jetë një formë kompensimi për pronarët./Euronews
