Londra po hedh një hap të ri drejt transportit pa shofer. Për herë të parë, banorët e kryeqytetit britanik mund të kenë mundësinë të udhëtojnë me një taksi autonome përmes aplikacionit Uber, falë automjeteve të zhvilluara nga kompania britanike e teknologjisë Wayve.
Por, për momentin, robotaksia nuk është ende një realitet i përditshëm për londinezët. Vetëm 15 automjete janë licencuar deri tani, ndërsa në kryeqytet operojnë më shumë se 100 mijë automjete private me qira. Megjithatë, interesi duket i madh: rreth 100 mijë përdorues të Uber janë regjistruar për të provuar udhëtimet autonome.
Automjetet janë Ford Mustang të modifikuara nga Wayve dhe do të mund të thirren direkt përmes aplikacionit Uber. Edhe pse makina drejtohet nga teknologjia autonome, për momentin në sediljen e përparme do të jetë gjithmonë një shofer sigurie i licencuar. Ai mund të ndërhyjë dhe të marrë kontrollin e automjetit në çdo moment, nëse situata e kërkon ose nëse pasagjeri e kërkon.
‘Transport for London’ ka dhënë autorizimin për funksionimin e këtyre automjeteve si mjete private me qira. Rregullat aktuale britanike ende kërkojnë praninë dhe mbikëqyrjen e një drejtuesi njerëzor.
Udhëtimi do të jetë disi ndryshe nga një taksi tradicionale. Pasagjerët do të njoftohen se shoferi i sigurisë nuk ka nevojë të flasë gjatë udhëtimit, por është aty për të ndërhyrë në rast nevoje.
Hapi i radhës është edhe më ambicioz: të zhduket plotësisht nevoja për një shofer në makinë. Për këtë kërkohet një proces tjetër miratimi nga Agjencia e Standardeve të Shoferit dhe Automjeteve, por një autorizim i tillë nuk pritet të vijë gjatë këtij viti.
Për Uber-in, hyrja e automjeteve Wayve në shërbim është një lëvizje e rëndësishme në garën për të ardhmen e transportit në Londër. Kryeqyteti britanik po shihet si një nga tregjet më të rëndësishme në Evropë për zhvillimin e automjeteve autonome.
Në këtë garë nuk është vetëm Uber. Edhe kompania e robotaksive në pronësi të Google, si dhe kompani kineze, po testojnë teknologjitë e tyre autonome në Londër.
Ndërsa në disa qytete të SHBA-së, Kinës dhe Emirateve të Bashkuara Arabe makinat plotësisht pa shofer tashmë janë pjesë e realitetit, Londra sapo ka nisur ta provojë këtë të ardhme. Për momentin, në sediljen e përparme ka ende një njeri. Por timoni po bëhet gjithnjë e më pak i nevojshëm.
