Dardanë, 24 nëntor 2025. Artisti i njohur Avni Behluli ka hapur ekspozitën personale “Fuqia e Ngjyrave në Ruajtjen e Identitetit”, një prezantim i krijimtarisë së tij në pikturë dhe skulpturë, ku miti, simboli dhe historia kombëtare zënë vend qendror.
Ekspozita sjell një përzgjedhje punimesh që rrëfejnë periudha të ndryshme historike dhe motive të trashëgimisë shqiptare, të interpretuara përmes një gjuhe të fuqishme koloristike dhe një qasjeje të veçantë stilistike. Vepra të Behlulit, të njohura për karakterin e tyre epik e lirik, pasqyrojnë figura mitike, heronj të epokave të ndryshme, si dhe realitete të aktualitetit tonë social e kulturor.
Artistit i atribuohet një rol i rëndësishëm në mbrojtjen dhe interpretimin e identitetit kombëtar. Punimet e tij kanë kaluar kufijtë e vendit, duke u prezantuar në ekspozita kombëtare dhe ndërkombëtare. Mes veprave të mirënjohura në Dardanë është edhe busti i Ismail Qemalit, vendosur në vitin 2004 në gjimnazin që mban emrin e këtij personaliteti historik.
Krijimtaria e Behlulit ndërthur elemente të florës, faunës, arkeologjisë dhe figuracionit mitik, duke sjellë një narrativë artistike që përbën një dëshmi autentike të trashëgimisë shqiptare dhe të zhvillimit të saj në kohë.
Ekspozita synon të rikthejë vëmendjen tek vlerat kulturore dhe simbolika e identitetit, duke ofruar për publikun një udhëtim estetik që shtrihet nga lashtësia urë deri në realitetin modern.
