Probizz.al në historinë e radhës flet për punishten “Veleçiku” ku prodhohet djathi nga përpunimi i qumështit të bagëtive të Kelmendit. Një nga zonat më të pasura me traditë blektorale në veri të Shqipërisë ka arritur të ktheje pasionin për prodhimet artizanale në një histori suksesi. Prodhuesi Gjovalin Hasanaj tregon në një intervistë për Probizz.al mënyrën se si kjo punishte ka ndërtuar një model bashkëpunimi të qëndrueshëm me dhjetëra fermerë të zonës , duke sjellë në treg një gamë të pasur produktesh autentike.
Probizz.al: Kur nisi punishtja “Djathë Veleçiku” dhe si lindi ideja?
Prodhuesi Gjovalin Hasanaj: Punishtja Djathë Veleçiku filloi si një sipërmarrje familjare në vitin 2009 për të zhvilluar traditën e fshatrave tona në Malësi të Madhe. Ne jemi të vendosur në fshatin Hot, buzë rrugës për Kelmend si një vend ndalese për në hyrje të Alpeve shqipëtare.
Filluam bashkëpunimin me disa fermerë këtu në zonë duke u grumbulluar dhe përpunuar qumështin dhe jemi të fokusuar në prodhimin e disa lloje djathërash.
Probizz.al : Sa lloje djathërash prodhoni dhe a bashkëpunoni vetëm me fermerë apo edhe shoqëri?
Prodhuesi Gjovalin Hasanaj: Fillimisht filluam me prodhimin e djathit të dhisë të bardhin tradicional të zonës, pastaj në bashkëpunim dhe me disa teknologë të huaj në kuadër të një projekti të ambasadës holandeze na u mundësua përmirësimi i kushteve në punishte dhe zhvilluam produktet duke arrit që sot të kemi mbi 18 lloje të ndryshme produktesh. Prodhojmë djathëra me erëza të ndryshme kryesisht të zonës siç janë me boronicë, me sherebel, me arra, me domate, hudhër, borzilok etj.
Gjithashtu prodhojmë kaçkavall dhie shumë të stazhionuar mbi një vit i cili është një produkt që po pëlqehet shumë në restorante.
Prodhuesi Gjovalin Hasanaj :Vit pas viti kemi zgjeruar bashkëpunimin ku sot bashkepunojmë më rreth 40-50 fermerë përgjatë vitit.
Kemi krijuar dhe një shoqëri të bashkëpunimit bujqësor ku si grup kemi rregjistruar “Djathin e Ziem të Veleçikut” si specialitet tradicional i garantuar i cili është një mënyrë prodhimi dhe gatimi e trashëguar ndër breza.
Probizz.al : Ku e bën diferencën me produktet, punishtja “Djathë Veleçiku”?
Prodhuesi Gjovalin Hasanaj: Djathi i zier, që njihet si “djathë i ziem”, është traditë shekullore e Malësisë së Madhe, ku gatuhej kryesisht për të nderuar mikun.
Të gjitha prodhimet tona janë të prodhuara në mënyrë artizanale dhe të stazhonuara që të jenë me shije dhe cilësi sa më të mirë.
Probizz.al :Kush janë klientët me besnikë?
Kemi klientë në disa restorante dhe hotele në Tiranë, disa bujtina dhe agroturizma në zonën e Veriut, shumë klientë familjare besnikë ku jemi kontaktuar nga panaire të ndryshme, gjithashtu dhe disa pika dyqanesh që kanë produkte natyrale.
Kemi marrë pjesë në disa panaire ndërkombëtarë të Sloë Food si në Itali, Gjermani dhe Spanjë.
