Inteligjenca artificiale ka shkurtuar kohën dhe numrin e personave që nevojiten për të krijuar një produkt marketingu. Që nga gjenerimi i ideve, posterave, fotove dhe videove, te krijimi i përmbajtjes në tërësi, specialistët e marketingut po përdorin ChatGPT, Microsoft Copilot, Gemini apo platforma të tjera të inteligjencës artificiale dhe të dizajnit grafik që kanë të integruar IA.
Sipas ekspertes së marketingut, Sonja Hoxha, bizneset gjithmonë e më shumë po zgjedhin që ta përdorin inteligjencën artificiale në komunikimin me klientët.
“Inteligjenca artificiale është futur në çdo hallkë të marketingut, që nga procesi kërkimor deri tek procesi kreativ apo dhe shpërndarja e mesazhit tek audienca. Në gjykimin tim personal, ajo që inteligjenca artificiale po i ndryshon sot departamentit të marketingut është shkurtimi i kohës. Ne tashmë për një kohë të shkurtër mund të kemi më shumë kreativa dhe më shumë ide marketingu”, tha Hoxha.
Shumë biznese po përdorin të njëjtat IA, dhe si përfundim kemi të njëjtat mesazhe, të njëjtat hook-e dhe të njëjtët persona që shfaqen në përmbajtjet e tyre. Gjithashtu, nëpërmjet inteligjencës artificiale, një person mund të kryejë 3 detyra të ndryshme.
“Kur deri më përpara ekipet e marketingut ishin shumë të mëdha nga proceset kërkimore deri tek zbardhja e reklamës, sot një content creator apo një ekspert marketingu mund t’i realizojë këto të gjitha në një person të vetëm, duke filluar që në qoftë se ai ka një ide, në zhvillimin e kreativës, voiceoveri dhe muzikës. Të gjitha këto janë mbledhur në një qelizë të vetme”, u shpreh ekspertja.
A e kanë ulur IA koston e bizneseve që përdorin marketing? Ekspertja shprehet se për bizneset e vogla, inteligjenca artificiale është një zgjidhje shumë e mirë, por për një biznes të mirëfilltë që do që të ketë një shtrirje më të gjerë të marketingut, kostoja nuk ulet shumë.
