Kanë hyrë në fuqi ndryshimet në Kodin Rrugor, të cilat parashikojnë masa më të ashpra për shkelësit, veçanërisht për drejtuesit e automjeteve që kapen të dehur në mënyrë të përsëritur.
Sipas rregullave të reja, një drejtues që është ndëshkuar më parë për drejtim mjeti në gjendje të dehur dhe kapet sërish me mbi 0.5 g/litër alkool në gjak, do ta humbasë patentën përgjithmonë, pa të drejtë për ta rimarrë, edhe nëpërmjet autoshkollës.
Ndryshime ka edhe për personat që drejtojnë automjet pa patentë. Të rriturit që kapen në timon pa leje drejtimi, përveç gjobës, nuk do të kenë të drejtë të regjistrohen në autoshkollë për një vit. Për të miturit masa është edhe më e rëndë: pasi të mbushin 18 vjeç, do të duhet të presin edhe dy vite të tjera për të aplikuar për patentë.
Rregulla të reja zbatohen edhe për shoferët e rinj. Gjatë dy viteve të para pas marrjes së patentës, ata nuk lejohen të konsumojnë asnjë sasi alkooli para drejtimit të mjetit. Gjithashtu, shpejtësia maksimale do të jetë 90 km/h në autostrada dhe 80 km/h në rrugët jashtë zonave të banuara. Shkelja e këtyre kufizimeve dënohet me gjobë nga 5 mijë deri në 15 mijë lekë, pezullim të patentës për një muaj dhe heqje pikësh. Nëse kryejnë dy shkelje brenda një viti, periudha e kufizimeve zgjatet nga dy në tre vite.
Një tjetër ndryshim i rëndësishëm lidhet me pezullimin e patentës. Ndryshe nga më parë, kur pezullimi mund të shmangej duke paguar dyfishin e gjobës, tashmë kjo mundësi hiqet për patentat e lëshuara nga autoritetet shqiptare dhe pezullimi zbatohet automatikisht.
Kodi i ri parashikon edhe gjoba më të larta për tejkalimin e shpejtësisë në zonat e banuara, pranë shkollave, si dhe për garat ose manovrat e rrezikshme me automjete. Gjobat rriten nga 20 mijë deri në 60 mijë lekë.
Po ashtu, nëse një drejtues kapet dy herë brenda një viti duke përdorur celularin në timon, patenta do t’i pezullohet për tre muaj. Ndalimi i përdorimit të celularit vlen jo vetëm për drejtuesit e automjeteve, por edhe për ata që lëvizin me biçikleta, motorë deri në 50 cc dhe monopatina./Tirana Post
