Larja e dhëmbëve mund të marrë një tjetër kuptim falë teknologjisë së re të Dyson. Kompania ka prezantuar CameraJet™, një furçë elektrike inteligjente që përdor kamerë, sensorë dhe Inteligjencë Artificiale për të analizuar mënyrën se si pastrojmë dhëmbët.
Në pamje të parë duket si një furçë elektrike e zakonshme, por CameraJet ka një mini-kamerë intraorale që filmon pjesë të gojës gjatë larjes. Sistemi analizon të dhënat në kohë reale dhe ndihmon përdoruesin të kuptojë se cilat zona janë pastruar siç duhet dhe cilat kërkojnë më shumë vëmendje.
Sipas Dyson, teknologjia mund të evidentojë edhe shenja që mund të lidhen me kavitete. Megjithatë, këto funksione janë menduar si një mënyrë për të ndihmuar në monitorimin e higjienës orale dhe nuk zëvendësojnë një vizitë te dentisti.
Një tjetër veçori e CameraJet është kombinimi i teknologjisë sonike me një rrymë të lëngshme. Kjo rrymë mund të drejtohet në mënyrë automatike drejt hapësirave mes dhëmbëve, duke synuar një pastrim më të fokusuar.
Të gjitha të dhënat e mbledhura gjatë larjes shfaqen në aplikacionin MyDyson. Përdoruesi mund të shohë zonat që janë pastruar, të marrë informacion mbi teknikën e përdorur dhe të kuptojë nëse ka ushtruar më shumë presion seç duhet.
Pas këtij produkti qëndrojnë disa vite punë dhe zhvillim. Dyson thotë se ka punuar për rreth gjashtë vite mbi këtë teknologji, me përfshirjen e 661 inxhinierëve, 38 patentave dhe 16 milionë rreshtave kodimi.
Edhe pjesa praktike është menduar në detaje. Furça përdor koka me gjurmim RFID, ka një rezervuar të rimbushshëm për lëngun, bateri të zëvendësueshme dhe një bazë që shërben si për karikim, ashtu edhe për rimbushjen e pajisjes.
Çmimi prej rreth 499 dollarësh e vendos CameraJet në kategorinë premium, por Dyson synon të sjellë një qasje krejtësisht të re ndaj një prej rutinave më të zakonshme të përditshme.
Në vend që larja e dhëmbëve të jetë thjesht një proces që bëhet në mënyrë automatike, kompania dëshiron që përdoruesi të marrë një pasqyrë më të qartë të asaj që po ndodh në gojën e tij, me ndihmën e kamerës, sensorëve dhe Inteligjencës Artificiale.
