Shqiptarët janë ata që e sigurojnë më pak jetën në krahasim me shtetasit e tjerë të Evropës Qendrore dhe Lindore. Raporti më i fundit i Xprimm tregon se sigurimi i jetës zë vetëm 9% të primeve në të gjithë kategorinë e produkteve të sigurimit, ndërsa vlera e primeve rezulton të jetë më e ulëta në rajon.
Këto shifra dëshmojnë edhe një herë shkallën e ulët të ndërgjegjësimit qytetar për të siguruar jetën, e cila garanton mbulimin e një pjese të shpenzimeve në rast problemesh shëndetësore, aksidenti apo vdekje. Sigurimi vullnetar, qoftë për jetën apo pronën, nuk shihet me prioritet, por si një barrë financiare dhe shpenzim më shumë në buxhetin e çdo familjeje. Nga familjet, ky fakt argumentohet me kostot e shtrenjta të jetesës të cilat nuk i lejojnë të paguajnë edhe për një sigurim më tepër, krahas sigurimit të makinës, i cili është i detyrueshëm dhe bëhet një herë në vit.
Në vlerë primesh, pas Shqipërisë renditet Mali i Zi dhe Maqedonia e Veriut për nivelin e ulët të penetrimit të sigurimit të jetës në popullsi. Ndërkohë, Serbia pozicionohet më mirë në Ballkanin Perëndimor. Pavarësisht kësaj, primet e sigurimit të jetës janë rritur për Shqipërinë në krahasim me vitin e kaluar, duke arritur në 13 milionë euro për gjysmën e parë të 2026.
Polonia mbetet tregu më i madh i sigurimit të jetës në rajonin e Evropës Qendrore dhe Lindore, me mbi 3.1 miliardë euro prime në janar-qershor të këtij viti.
Disa nga produktet e sigurimit të jetës që ofrohen nga kompanitë janë ai për hua, pra i debitorit, sigurimi për shëndetin, aksidentet dhe sigurimi i jetës me kursim/përfitim. Shumica e primeve të shkruara bruto të të gjitha llojeve të sigurimit të jetës shkojnë për sigurimin e jetës së debitorit. Pra, ata që sigurojnë jetën, janë personat që marrin kredi në banka apo institucione mikrofinanciare të licensuara, për efekt mbrojtje nga rreziku i pamundësisë së mosshlyerjes së kredisë në rast se vdesin. /Scan
