Përmeti nuk është vetëm vendi i destinacioneve magjepsëse, por edhe qytet i cili të mahnit me histori. Ditët e fundit gjatë monitorimit të punimeve për zbatimin e projektit task 5, për zhvillimin e integruar urban dhe turistik Berat-Përmet, u evidentua dhe u zbulua një varrezë e cila mendohet se i përket periudhës së mesjetës së hershme. Që në momentin që ky varr u zbulua dhe deri tani specialistët kanë nxjerrë në dritë objektet të ndryshme të periudhës së Mesjetës së Hershme.
Lajmin e bëri të ditur Ministria e Kulturës, Elva Margariti në rrjetin e saj social, ku ka theksuar se “Specialistët e Institutit Kombëtar të Trashëgimisë Kulturore dhe DRTK Gjirokastër kanë nxjerrë në dritë objekte dhe po dokumentojnë dhe identifikojnë rezultatet e gërmimeve,” u shpreh ministria Margariti.
Specialistët e Institutit Kombëtar të Trashëgimisë Kulturore dhe DRTK Gjirokastër gjatë gërmimet e tyre të kryera në këtë zone, kanë evidentuar dhe nxjerë në pah vathët, unazat dhe varëset e zbukuruara, të cilat i përkasin mesjetës së hershme, prej shek. VIII-IX deri në XI. Zbulimi i kësaj varreze shton informacionin për gjeografinë e shpërndarjes së kulturës arbërore në vendin tonë”, theksoi ndër të tjera Margariti.
Punimet për gërmime po vijojnë dhe sigurisht informacione më të detajuara do të na vijnë në ditët në vijim. Si rezultat i gërmimeve, punimet për zbatimin e projektit task 5, për zhvillimin e integruar urban dhe turistik Berat-Përmet, janë pezulluar për t’i dhënë përparësi inspektimeve dhe gërmimeve arkeologjike në këtë zonë.
Burimi: Into Albania
