Në një hap të rëndësishëm që forcon pozicionin e saj si lider në tregun shqiptar të energjisë, Albesol ka finalizuar të gjitha fazat përgatitore për implementimin e teknologjisë më të re “Airset”. Kjo teknologji përfaqëson një ndryshim thelbësor në industrinë e shpërndarjes së energjisë elektrike, duke zëvendësuar gazin SF6, i njohur për ndikimin e lartë në ngrohjen globale, me ajër të pastër, duke sjellë kështu një alternativë të qëndrueshme dhe miqësore me mjedisin.
Pas marrjes së licencës nga partneri strategjik Schneider Electric, Albesol ka ndërmarrë një proces të plotë përgatitjeje që garanton standardet më të larta evropiane. Stafi i kompanisë është trajnuar dhe certifikuar drejtpërdrejt në fabrikat e Schneider në Macon të Francës, ndërsa linja e asamblimit në fabrikën e Albesol është përshtatur tërësisht sipas normave europiane, duke ofruar një sipërfaqe të konsiderueshme për të ndjekur hap pas hapi procesin e asamblimit deri në përgatitjen përfundimtare të produktit për shitje. Për të garantuar cilësinë dhe sigurinë e çdo njësie, është ngritur gjithashtu një dhomë testimi në përputhje të plotë me standardet europiane, e pajisur me infrastrukturën e nevojshme elektrike dhe mekanike për testimin e plotë të aseteve. Me çmimet e përditësuara dhe ofertat gati, Albesol është tashmë në pozitën të nisë shitjet dhe t’iu përgjigjet kërkesave të klientëve.
Inovacioni që vjen me serinë “Airset” nuk qëndron vetëm tek ndikimi mjedisor. Teknologjia e re ruan të pandryshuara të gjitha karakteristikat funksionale të serive të mëparshme, si SM6 me gaz SF6, duke garantuar të njëjtat dimensione, operim dhe funksionim. Kjo mundëson një tranzicion të qetë dhe një zëvendësim të lehtë pa ndërprerje në infrastrukturën ekzistuese. Ndër veçoritë kryesore janë celësi me tre pozicione (hapur, kyçur, tokëzuar), si dhe tokëzimi i drejtpërdrejtë i kabllit pa pasur nevojën për të kyçur ndërprerësin e qarkut.
Por zemra e kësaj teknologjie qëndron tek mekanizmi inovativ “Plug and Play”, i cili sjell një performancë mekanike dukshëm më të lartë. Ky mekanizëm ofron deri në 10,000 operime dhe karakterizohet nga mirëmbajtje e reduktuar, duke mos kërkuar lubrifikim (grasatim) dhe duke siguruar rezistencë të lartë ndaj mjediseve të ashpra. Jetëgjatësia e zgjatur deri në 40 vjet dhe lehtësia e servisimit janë tregues të tjerë të qasjes së re teknologjike: motori mund të zëvendësohet në vetëm 5 minuta (krahasuar me 90 minuta më parë), ndërsa motorizimi i mekanizmit realizohet për 15 minuta, nga minimalisht 3 orë që kërkoheshin më parë. Kjo përkthehet në një reduktim drastik të kohës së implementimit dhe të ndërprerjes së furnizimit me energji elektrike, duke rritur ndjeshëm efikasitetin operacional.
Një tjetër dimension inovativ i serisë Airset është aftësia për monitorim të avancuar. Përmes kësaj teknologjie bëhet i mundur monitorimi i ndërprerësit, monitorimi i mjedisit dhe monitorimi termik, duke përdorur sensorë të lagështirës dhe temperaturës të vendosur në pikat më kritike të pajisjes. Ky nivel monitorimi mundëson parandalimin e hershëm të kushteve jonormale të aseteve, duke kaluar në një model mirëmbajtjeje të bazuar në nevojën reale. Si rezultat, optimizohet planifikimi i mirëmbajtjes dhe ulen ndjeshëm kostot e saj.
E gjithë kjo arritje vjen në kuadër të strategjisë së përgjithshme të Albesol, kompania lider shqiptare në ofrimin e zgjidhjeve të plota në fushën e energjisë, nga projektimi dhe prodhimi deri te furnizimi. Me një histori suksesi dhe besueshmërie, Albesol ka realizuar projekte me ndikim kombëtar dhe rajonal, duke funksionuar sipas standardeve më të larta ndërkombëtare. E gjithë operacioni i kompanisë, nga fabrika në Baldushk dhe fabrika e re në Kanada, te stafi i certifikuar, bazohet në produktet dhe standardet e Schneider Electric, duke garantuar cilësi, besueshmëri dhe inovacion në çdo projekt.
Me teknologjinë Airset, Albesol jo vetëm që konfirmon angazhimin e saj për mbrojtjen e mjedisit, por vendet edhe një herë veten në ballë të inovacionit, duke ofruar për tregun shqiptar dhe atë rajonal produkte të sigurta, të teknologjisë më të fundit dhe të gatshme për sfidat e së ardhmes.
