Mund ta lexoj një kliente sapo hyn në derë…Alda rrëfen pasionin e saj për Probizz.al
Shumë vajza e kanë nisur rrugëtimin e tyre për të ofruar shërbime bukurie pasi kanë ndjekur thjesht kurse disa mujore. Por kjo nuk ndodh me profesionisten Alda Gjuzi e cila i është përkushtuar maksimalisht zanatit të saj duke studiuar, praktikuar dhe më pas duke hedhur hapin në hapjen e një studioje. Me një koncept të veçantë Alda është pozicionuar me shërbime në një zonë mjaft të frekuentuar pranë Gjykatës Administrative në Tiranë. Ajo ofron një sërë shërbimesh për klientët qoftë për kujdesin e flokëve, make up profesional apo teknika të tjera më të fundit që ofrohen në funksion të bukurisë. Thuajse të gjitha vajzat kur janë të vogla janë kureshtare të eksplorojnë me modelet e flokëve madje duke i prerë vetë, por në rastin e Alda Gjuzi vesi vazhdon: dikur e vogël priste baluket e saj duke lozur e sot, pret flokët e dhjetra vajzave dhe grave. Me një përkushtim të lartë në profesionin e saj Alda flet me pasion për rrugëtimin e nisur dhe na tregon disa sekrete për veten…
Prej sa vitesh drejtoni Alda Gjuzi Studio?
Hapja e një studioje ka qenë e menduar që pas perfundimit të studimeve, por u realizua rreth dy vite më parë.
Si lindi pasioni për tu marrë me të bukurën dhe cilat janë konkretisht shërbimet që ofroni?
Nuk mund të të përmend një moment specifik se kur e kuptova që doja të bëhesha parukiere, por mund të them se që në fëmijëri prisja baluket e mia dhe luaja gjithmonë rolin e parukieres. Kjo u zhvillua dhe më shumë gjatë viteve, mbarova studimet për parukeri dhe ja ku jam sot.
Sa e vështirë është të merresh me gratë dhe vajzat?
Në fillimet e mia ka qenë goxha e vështirë, e kisha gati të pamundur ndonjëherë që të lexoja mendjen e një klienteje dhe qëndroja paksa në ankth si do e përjetonin ndryshimin që kishin bërë. Ndërsa tani pas 7 vitesh punë mund ta lexoj një kliente sapo hyn në derë, dhe e kuptoj disi stilin e saj dhe çfarë mund të pëlqejë.
Çfarë keni studiuar?
Une kam studiuar në Qendrën Multifunksionale ” New Generation”, dhe kam kryer shkollën 2- vjeçare aty duke u pajisur me diplomë e cila njihet në pothuajse të gjitha shtetet e botës. Ka qenë eksperienca ime më e bukur në atë shkollë.
Jeni koshiente besoj që sot ka shumë persona që merren me këtë zanat, ku dallon shërbimi juaj?
Është shumë e vërtetë që sot ka tmerrësisht shumë parukiere dhe sallone të cilat hapen pa hasur as vështirësinë më të vogël, gjithsesi do theksoja që unë studion time e hapa pas 5 vitesh punë dhe eksperience. Kam ndjekur një arsim si me teori edhe në praktikë e cila më ka ndihmuar të kuptoj flokun që në brendësi të tij e deri në sipërfaqe. Punoj me shumë dedikim dhe detaje. Mendoj është çështje pasioni, une e dua këtë punë, e dua të bukurën, më pëlqejnë sfidat dhe mbi të gjitha i njoh limitet deri ku mund të procedoj me flokun, në mënyrë që ai të mbetet po aq i shëndetshem sa një flok natyral.
A keni një mesazh për klientët, për cfarë duhet të kenë kujdes kur i drejtohen studiove apo salloneve?
Fillimisht do thoja që klientët duhet të bëjne pjesë të rutinës së tyre konsultën paraprake me specialistet e flokut. Më ndodh shpesh që klientët lënë orar për ndryshime në flokun e tyre, por njëkohësisht nuk janë të bindur për ndryshimin që duan të ndërmarin. Prandaj bashkëbisedimi dhe ndarja e ideve në konsultë ndihmojnë që klientët të arrijnë atë që duan me flokun e tyre, dhe gjithmonë të dalin të kënaqur nga sallonet. Gjithashtu një këshillë që do jepja, është që klientët kur shkojnë për herë të parë në një studio ose sallon, të interesohen më shumë për produktet që do i perdorin në flokët e tyre. Kjo ndihmon në shmangien e problematikave që mund të shkaktojnë produkte të caktuara në flokë.
Na flisni pak për Alda Gjuzin jashtë studios
Do ta përshkruaja veten si një person shumëngjyrësh. Me këtë dua të them se përveç parukerisë që është një pasion i imi, ka dhe shumë gjëra të tjera që më pëlqen të bëj kur gjej sadopak kohë. Më pëlqen të vizatoj në telajo, të lexoj dhe të udhëtoj. Fundjavave përpiqem të kaloj sa më shumë kohë me familjen në Rrogozhinë, aty pastaj më del dhe në pah ana ime countryside. Aty jam fiks vetvetja pasi nuk më pëlqen shumë metropoli. Ah, dikur edhe këndoja, por kjo mbetet paksa një sekret .
Kontakt:
