Durrësi, kryeqyteti shqiptar i turizmit, ka hapur zyrtarisht sezonin turistik veror me një atmosferë festive dhe një kalendar të pasur aktivitetesh sportive, kulturore dhe artistike. I kthyer vitet e fundit në një destinacion të preferuar për vizitorët gjatë gjithë vitit, qyteti bregdetar pritet të përjetojë edhe këtë sezon flukse të larta turistike.
Muajt e verës mbeten periudha me numrin më të madh të vizitorëve, falë rikthimit në atdhe të emigrantëve dhe shqiptarëve të diasporës, por edhe turistëve të huaj që zgjedhin Durrësin për pushimet e tyre pranë brigjeve të Adriatikut.
Me rastin e hapjes së sezonit, Bashkia e Durrësit ka organizuar aktivitete të shumta përgjatë fundjavës, duke sjellë gjallëri në qytet dhe përgjatë vijës bregdetare. Starti zyrtar i sezonit u dha paraditen e së shtunës në pishinën publike të qytetit, ku u zhvillua një kampionat noti me pjesëmarrjen e dhjetëra fëmijëve dhe të rinjve të grupmoshave 7 deri në 17 vjeç.
Ndërkohë, plazhet e Durrësit janë tashmë gati për të pritur pushuesit, pas përfundimit të zgjerimit, pastrimit dhe plugimit të rërës. Paralelisht me turizmin bregdetar, qyteti po promovon edhe potencialin e tij kulturor dhe historik. Hapja e Muzeut Arkeologjik dhe Muzeut Etnografik u ofron vizitorëve mundësinë të zbulojnë nga afër trashëgiminë e pasur kulturore të qytetit.
Përtej historisë, arkeologjisë dhe vijës së gjatë bregdetare, Durrësi po tërheq gjithnjë e më shumë turistë të apasionuar pas aventurës dhe aktiviteteve dinamike. Një nga risitë e këtij sezoni është zhvillimi i turizmit të aventurës, i cili po zgjon interes të veçantë tek turistët gjermanë.
Përgjatë tre muajve të verës është planifikuar një kalendar i ngjeshur aktivitetesh kombëtare dhe ndërkombëtare, ku përfshihen koncerte, festivale, shfaqje teatrale dhe aktivitete të tjera argëtuese që synojnë ta mbajnë qytetin aktiv gjatë gjithë sezonit.
Sipas autoriteteve lokale, Durrësi hyn në këtë sezon me rreth 300 struktura akomoduese të gatshme për turistët vendas dhe të huaj, ndërsa janë marrë të gjitha masat për menaxhimin dhe mbarëvajtjen e sezonit turistik.
Rritja e vazhdueshme e numrit të vizitorëve vitet e fundit e ka konsoliduar Durrësin si një nga destinacionet më të rëndësishme turistike në Shqipëri. Për këtë sezon veror, pritshmëritë janë për një rritje të fluksit turistik me rreth 15% krahasuar me vitin e kaluar.
