Emrah Bilalli lindi më 1 shtator 1988 në qytetin e Kumanovës. Shkollimin fillor dhe atë të mesëm i mbaroi në vendlindje, ndërsa studimet universitare në Universitetin “Shën Kirili dhe Metodi”, në Fakultetin e Filologjisë “Bllazhe Konevski” – Katedra e Gjuhës dhe e Letërsisë Shqiptare në Shkup, ku u diplomua si profesor i Gjuhës dhe i Letërsisë Shqiptare në vitin akademik 2010/2011.
Studimet pasuniversitare i vijon në Institutin e Trashëgimisë Shpirtërore e Kulturore të Shqiptarëve në Shkup, në drejtimin “Kulturologji”, fusha studimore në shkencat humane dhe sociale.
Prej vitit 2018, punon në arsimin fillor si mësimdhënës i Gjuhës dhe i Letërsisë Shqiptare në SHFK “Jeronim de Rada”, në Çerkez të Kumanovës. Në vitin 2022, është zgjedhur anëtar dhe koordinator i Lidhjes së Arsimtarëve Shqiptarë “Naim Frashëri” (Kumanovë–Likovë) për organizimin e kuizeve të diturisë dhe festave kombëtare. Në vitin 2024, u zgjodh në cilësinë e sekretarit të Klubit të Shkrimtarëve Shqiptarë “Jehona e Karadakut” në Kumanovë, ku shërben edhe si moderator i të gjitha takimeve poetike dhe kulturore.
Gjatë veprimtarisë së tij, i udhëhequr nga një pasion dhe energji e pashoqe, ka shërbyer për dy vite edhe në sferën e klericizmit si thirrës i ezanit në “Xhaminë e Re” në Kumanovë, i autorizuar si muezin nga Bashkësia Fetare Islame e qytetit.
Përveç mësimdhënies dhe krijimtarisë, Bilalli ushtron edhe veprimtari mediatike si gazetar dhe korrespondent për qytetin e Kumanovës në televizionin kombëtar “Alsat-M”. Në kuadër të emisionit “Ditë e Re”, ai ka realizuar rubrika të rëndësishme kulturore si: “Këndi i librit”, “Talentët e rinj”, “40 pyetje për 40 vetë”, “Mes librash” dhe ciklin e veçantë kushtuar trashëgimisë “Shpirtërorja mes nesh”.
Aktivitetet letrare kanë qenë pjesë përbërëse e jetës së tij që në shkollën fillore, fillimisht në grupet letrare me interpretime poezish dhe moderim programesh artistike. Në moshën 15-vjeçare nisi të merret me krijimtari artistike, duke lëvruar veçanërisht poezinë dhe prozën. Krijimet e tij janë botuar në revista të njohura për letërsi, shkencë dhe kulturë, si: “Doruntina” (Kumanovë), “Heshtja” (Shkup), “Jetë studentore” (Shqipëri), “Agmia” (Gjilan), “Allmanak” (Tetovë), “Metamorfozat e vjeshtës” (Viti), si dhe në gazetën “Nacional” (Tiranë) e në platforma të ndryshme elektronike. Ai zotëron gjuhën shqipe, maqedonase, turke dhe angleze.
U vlerësua me disa çmime dhe mirënjohje:
-Vendi i dytë “Pena ime” – Konkursi i organizuar nga “Jehona e Karadakut”, Kumanovë (2019);
-Çmimi “Premtimi poetik” – Takimet “Pranvera poetike në Likovë” (2024);
-Çmimi “Anëtar Nderi” – Takimet Poetike të Sharrit, Tetovë (2024);
-Çmimi Inkurajues – Konkursi mbarëkombëtar nga Lidhja e Shkrimtarëve dhe Artistëve të Durrësit (2025);
-Mirënjohje nga USAID dhe komuna e Kumanovës e Gjilanit për shkëmbime kulturore, etj.
Emrah Bilalli ka qenë pjesëmarrës në konferenca ndërkombëtare, seminare dhe festivale poetike (përfshirë “Ditët e Naimit”) në vende të ndryshme si: Maqedoni e Veriut, Kosovë, Shqipëri, Turqi, Mal i Zi, Kroaci, Bosnjë, Sllovaki, Austri dhe Norvegji.
Libri “Pas shumë kilometrash” botuar nga KSh “Jehona e Karadakut” në Kumanovë (2026), është përmbledhja e parë poetike e autorit Emrah Bilalli.
