Dhoma e Tregtisë dhe Industrisë Durrës mori pjesë në Forumin e Diskutimit të projektit DUALBA, i zhvilluar në Universitetin “Aleksandër Moisiu” në Durrës, ku u mblodhën përfaqësues të universiteteve, institucioneve publike, komunitetit të biznesit dhe politikëbërësve për të diskutuar mbi zbatimin e modelit të arsimit dual në Shqipëri.
Forumi u fokusua në forcimin e bashkëpunimit ndërmjet universiteteve dhe sektorit privat, me synimin për të krijuar mundësi më të mira për studentët dhe për t’i pajisur ata me aftësi profesionale të përshtatura me kërkesat reale të tregut të punës.
Gjatë diskutimeve, Kryetari i Dhomës së Tregtisë dhe Industrisë Durrës, Neritan Golja, theksoi rëndësinë e ndërtimit të partneriteteve të qëndrueshme mes biznesit dhe institucioneve të arsimit të lartë. Ai nënvizoi se përfshirja aktive e sektorit privat në procesin e formimit profesional të të rinjve është një element kyç për rritjen e punësimit dhe zhvillimin ekonomik të vendit.
Pjesëmarrësit ndanë ide dhe përvoja mbi sfidat dhe mundësitë që ofron modeli i arsimit dual, duke e konsideruar atë si një instrument të rëndësishëm për afrimin e arsimit me nevojat konkrete të tregut të punës.
Dhoma e Tregtisë dhe Industrisë Durrës riafirmoi angazhimin e saj për të mbështetur iniciativa që kontribuojnë në zhvillimin e aftësive profesionale të të rinjve, rritjen e punësimit dhe forcimin e lidhjeve ndërmjet arsimit dhe biznesit, në funksion të një ekonomie më konkurruese dhe një tregu pune më të përgatitur për sfidat e së ardhmes.
