Shqiptarët vazhdojnë të mbështeten kryesisht te motorët e kërkimit për të gjetur informacion në internet, ndërsa chatbot-et e inteligjencës artificiale mbeten ende një mjet me përdorim shumë të kufizuar. Të dhënat e StatCounter për majin e vitit 2026 tregojnë se platformat e kërkimit zotërojnë 70.04% të tregut të referimeve online në Shqipëri.
Nga ana tjetër, rrjetet sociale përbëjnë 29.71% të tregut, duke mbetur një kanal i rëndësishëm për zbulimin e përmbajtjes dhe informacionit. Megjithatë, pesha e tyre ka rënë ndjeshëm gjatë muajve të fundit, teksa motorët e kërkimit kanë fituar terren.
Ndërkohë, chatbot-et e bazuara në inteligjencën artificiale përfaqësojnë vetëm 0.25% të tregut. Edhe pse përdorimi i mjeteve si ChatGPT dhe platformave të ngjashme është rritur në nivel global, të dhënat sugjerojnë se ndikimi i tyre në trafikun online në Shqipëri mbetet ende shumë i vogël krahasuar me format tradicionale të navigimit në internet.
Gjatë vitit të fundit ka ndodhur një ndryshim i dukshëm në sjelljen e përdoruesve. Në mesin e vitit 2025, motorët e kërkimit dhe rrjetet sociale kishin pothuajse të njëjtën peshë, secila kategori me rreth gjysmën e tregut. Megjithatë, në muajt e fundit të analizës, kërkimi online ka shënuar një rritje të fortë, duke arritur nivelin më të lartë të periudhës, ndërsa rrjetet sociale kanë pësuar një tkurrje të konsiderueshme.
Kjo tendencë sugjeron se përdoruesit shqiptarë po orientohen gjithnjë e më shumë drejt kërkimit të drejtpërdrejtë të informacionit në internet, ndërsa inteligjenca artificiale, pavarësisht vëmendjes së madhe që ka marrë globalisht, ende nuk ka arritur të ndryshojë në mënyrë domethënëse mënyrën se si shumica e shqiptarëve navigojnë dhe gjejnë informacion online.
Google Chrome po forcon ndjeshëm dominimin në tregun shqiptar të shfletuesve të internetit. Të dhënat e StatCounter tregojnë se në maj, Chrome arriti të kontrollojë 67.12% të tregut, niveli më i lartë i regjistruar gjatë 12 muajve të fundit.
Në kahun tjetër, Safari ka përjetuar një ecuri të kundërt. Shfletuesi i Apple, i cili një vit më parë lëvizte pranë nivelit 38-40%, ka rënë në 27.04% në maj 2026. Kjo do të thotë se Safari ka humbur mbi 10 pikë përqindjeje brenda një viti, ndërsa diferenca me Chrome është zgjeruar ndjeshëm./Scan
