Në zemër të Shkupit, u çel edicioni jubilar i Internacional Art Simpozium Struga 2015–2025, duke e rikonfirmuar rolin e këtij eventi si një prej platformave më të rëndësishme të dialogut ndërkombëtar artistik. Përgjatë një dekade, simpoziumi ka ndërtuar një identitet të fortë kulturor, duke u shndërruar në një pikëtakim të çmuar të ideve, vizioneve dhe energjive krijuese nga mbarë bota.
Mbrëmja gala mblodhi 42 artistë pjesëmarrës nga vende të ndryshme, ndërsa më shumë se 100 vepra të realizuara ndër vite u prezantuan në hapësirën historike të Galerisë Çifte Hamam. Ekspozita u shndërrua në një skenë të gjallë ku u shpalosën qasje të shumëllojshme estetike dhe prurje bashkëkohore, duke dëshmuar fuqinë e artit si një gjuhë universale që bashkon kultura dhe përvoja të ndryshme.
Ky edicion i 10-vjetorit nuk përfaqëson vetëm një përmbledhje krijimtarie, por edhe një dëshmi të ndikimit që aktivitete të tilla kanë në zhvillimin kulturor të vendit. Simpoziumi kontribuon në forcimin e bashkëpunimit ndërkombëtar, gjallërimin e skenës artistike dhe konsolidimin e Shkupit si një qendër me peshë në hartën kulturore rajonale dhe globale.
Mirënjohje dhe falënderime të veçanta i drejtohen organizatorëve:
z. Burhan Ahmeti, zj. Jelldez Asani, zj. Akime Nasudi, zj. Teuta Imeri, z. Verim Zendeli, z. Berat Zulbe, si dhe të gjithë artistëve pjesëmarrës, për profesionalizmin, përkushtimin dhe kontributin e vyer në pasurimin e peizazhit kulturor të qytetit.
