Nga një kompani si Toyota, mund të presësh gjithçka. Automjeti i saj më i shtrenjtë nuk është një makine super sportive apo një limuzinë luksoze, por një mjet i veçantë dhe i pazakontë për transportin e pasagjerëve.
Toyota e-Palette, e prezantuar për herë të parë si koncept në CES 2018 dhe më pas në Lojërat Olimpike të Tokios 2021, tashmë po hyn në tregun japonez pas disa vitesh testimesh.
Ky automjet ka dimensione të mëdha: 4.95 metra gjatësi, 2.08 metra gjerësi dhe 2.65 metra lartësi. Dizajni i tij minimal dhe simetrik, me sipërfaqe të mëdha xhami dhe drita LED të rrumbullakëta, i jep pamjen e një dhome ndenjeje në lëvizje, më shumë sesa një mjeti tradicional transporti publik.
Përveç transportit të pasagjerëve, kabina mund të përshtatet dhe të funksionojë si zyrë e lëvizshme, sallë pritjeje apo dyqan i lëvizshëm. Toyota parashikon përdorimin e tij si transport pasagjerësh në mëngjes, pikë shitjeje ushqimesh në mesditë dhe hapësirë argëtimi në mbrëmje.
Surpriza më e madhe është çmimi: në Japoni, e-Palette fillon nga 29 milionë jen, rreth 196,000 euro, duke e bërë atë makinën më të shtrenjtë në historinë e Toyota-s, edhe më tepër sesa SUV-i i tyre luksoz prej 182,000 eurosh. Subvencionet qeveritare e ulin ndjeshëm këtë çmim, megjithëse mbetet një investim për një grup shumë të kufizuar klientësh.
Prodhimi do të jetë me porosi, dhe e-Palette do të përdoret fillimisht në hapësira publike dhe në “Qytetin e Endur” futurist të Toyota-s, ku do të demonstrohet potenciali i tij si një automjet inovativ dhe shumëfunksional.
