Kompanitë e sigurimit nuk po arkëtojnë shumë të ardhura nga produkti i Kartonit Jeshil dhe sigurimit kufitar. Për të disatin muaj radhazi, gjithnjë e më pak prime të shkruara bruto janë shënuar nga sigurimi i automjeteve me targa të huaja që qarkullojnë brenda territorit të Shqipërisë dhe sigurimit me Karton Jeshil për automjetet me targa shqiptare që dalin jashtë vendit tonë, ndërsa MTPL e brendshme vijon të kapë shifra rekord.
Të dhënat më të fundit nga Autoriteti i Mbikëqyrjes Financiare tregojnë një ulje me 1% të primeve të shkruara bruto për Kartonin Jeshil në tremujorin e parë të këtij viti dhe një rënie me 2.7% të atyre për sigurimin kufitar krahasuar me tremujorin e fundit të vitit të kaluar. E thënë me fjalë të tjera, primet e mbledhura nga Kartoni Jeshil ranë në 460 mijë lekë nga 464 mijë lekë që ishin më parë, ndërsa ato të sigurimit kufitar në 55 mijë lekë nga 56 mijë lekë.
Por cilët janë faktorët që mund të kenë ndikuar në këtë rënie të vazhdueshme?
Në krahasim me fundin e vitit të kaluar, hyrje-daljet me makinë janë pakësuar. Pakësimi i hyrje-daljeve, i cili mund të ketë ardhur për shkak të ndikimit që solli lufta në Lindjen e Mesme dhe rritja e çmimit të naftës, ka ulur numrin e udhëtimeve me makinë. Kështu në 3 muajt e parë të këtij viti rezultojnë 500 mijë hyrje më pak se në fundin e vitit të kaluar dhe 300 mijë dalje më pak se në tremujorin e fundit 2025.
Për sa i takon Kartonit Jeshil, më pak të ardhura janë arkëtuar për shkak të uljes së çmimit të tij.
Prej 1 shkurtit të vitit të kaluar, të gjithë makinat që udhëtonin drejt Malit të Zi, përfituan zbritje të çmimit të sigurimit për “Karton Jeshil”. Nga 400€ që ishte primi për 1 vit, tani ata paguajnë vetëm 50€. Ndërkohë, nga 1 prilli, qytetarët shqiptarë fituan edhe mundësinë që të lëvizin drejt Maqedonisë së Veriut me policën e sigurimit “Karton Jeshil” me afat 1-vjeçar, me çmim të reduktuar 50 Euro./Scan
