Edhe këtë vit shanset që të jeni hasur më një polak/e në rrugë në një nga ditët e vitit janë të larta edhe pse numri hyrjeve nga ky vend kanë rënë. Në total, në dhjetë muaj, kanë hyrë në territorin e vendit tonë rreth 279 mijë polakë. Por çfarë vihet re nga të dhënat e INSTAT? Turizmi hyrës në Shqipëri gjatë vitit 2025 po shfaq një tendencë të qartë drejt rritjes së cilësisë dhe qëndrimeve më të gjata në strukturat akomoduese. Brenda këtij trendi, Polonia shfaqet si një nga tregjet kryesore të turizmit hyrës.
Pavarësisht rënies vjetore prej 8.9% të hyrjeve nga polakët përgjatë periudhës Janar-Tetor, Polonia rezulton si një treg i qëndrueshëm për akomodimet turistike në Shqipëri gjatë vitit 2025.
Të dhënat mujore të akomodimeve tregojnë se ky vend ka qenë në mënyrë të përsëritur mes destinacioneve kryesore të origjinës së vizitorëve jo-rezidentë. Në Prill 2025, turistët polakë renditen në “Top 5” me 7% të totalit, përkrah Italisë, Kosovës, Gjermanisë dhe Mbretërisë së Bashkuar.
Kjo prirje vijon edhe në sezonin e lartë. Polonia përfaqëson 11% të vizitorëve të akomoduar në Korrik, 12% në Gusht, dhe 11% në Shtator, duke e konfirmuar si një nga tregjet më të rëndësishme europiane për turizmin shqiptar, edhe pse hyrjet në total kanë shënuar rënie.
Kontrasti mes rënies së hyrjeve dhe peshës së lartë në akomodime sugjeron se turistët polakë që zgjedhin Shqipërinë po qëndrojnë më gjatë, po udhëtojnë në periudha jashtë sezonit, ose po paraqiten me ritme më të qëndrueshme krahasuar me tregjet e tjera.
Nga ana tjetër, ekspertët theksojnë se vitet e fundit polakët po investojnë e më shumë në prona në vendin tonë./Scan
