Ekipi i Ministrisë së Bujqësisë dhe Zhvillimit Rural në bashkëpunim me Organizatën e Kombeve të Bashkuara për Ushqimin dhe Bujqësinë (FAO), si pjesë e programit të kontrollit biologjik për dëmtuesit e gështenjës, nisën lëshimin e Grerëzës Aziatike në masivin e gështenjave të Tropojës.
Një proces i rëndësishëm i luftës biologjike, që mbron gështenjat nga dëmtuesit duke ruajtur e siguruar prodhimin.
“Nxisim rritjen ekonomike për zonën e Tropojës, duke shtuar vëmendjen tek Gështenja, si një produkt prioritar me potencial të lartë për eksport” shkruan ministrja Denaj në një postim në facebook.
Insektet po prodhohen në laboratorin e ngritur në Tropojë dhe parashikohet që të lëshohen në 21 pika nga zona e Markajve deri në Nikaj-Mërtur.
Ministria e Bujqësisë është e angazhuar me FAO-n dhe Bashkinë Tropojë, që ky proces të zgjasë për disa vite në vazhdim sipas nevojës.