Mira Murati po përgatitet të sjellë një tjetër risi në botën e Inteligjencës Artificiale. Startup-i i saj, Thinking Machines Lab, po zhvillon një model të ri IA që synon të komunikojë me përdoruesit në mënyrë shumë më natyrale dhe të ngjashme me bisedat njerëzore. Ndryshe nga chatbot-et aktuale, ku përdoruesi flet dhe më pas pret përgjigjen e Inteligjencës Artificiale, modeli i ri i kompanisë do të mund të përpunojë fjalinë dhe të gjenerojë përgjigjen në të njëjtën kohë. Kjo do ta bëjë komunikimin të ngjajë më shumë me një telefonatë reale sesa me një shkëmbim mesazhesh.
Teknologjia njihet me termin “full duplex”, ndërsa kompania pretendon se modeli i saj eksperimental, TML-Interaction-Small, arrin të përgjigjet për vetëm 0.40 sekonda, afërsisht shpejtësia e një bisede normale njerëzore dhe më e shpejtë se shumë modele ekzistuese të OpenAI dhe Google.
Megjithatë, bëhet fjalë ende për një projekt kërkimor dhe jo për një produkt të gatshëm për publikun. Sipas kompanisë, një “pasqyrë e kufizuar kërkimore” pritet të publikohet në muajt e ardhshëm, ndërsa një version më i gjerë mund të vijë gjatë këtij viti.
Ekspertët e teknologjisë vlerësojnë se nëse premtimet teknike konfirmohen në përdorim real, kjo mund të përfaqësojë një nga ndryshimet më të mëdha në mënyrën si njerëzit ndërveprojnë me Inteligjencën Artificiale.
Për momentin, mbetet për t’u parë nëse përvoja praktike do të arrijë të përmbushë pritshmëritë edha që ka ngritur projekti i ri i Mira Muratit./Businessmag
