Ndryshimi i ligjit për fotovoltaikët, prodhuesit: Lajm fantastik

Një ditë pas publikimit të lajmit për ndryshimin e ligjit për prodhuesit e energjisë nga dielli apo era, sipërmarrësit që merren me këtë fushë e kanë përshëndetur vendimin.

Për Probizz.al Z. Rako Paja President i kompanisë “Eco Energia” thotë se ky hap shtyn më tej qytetarët dhe bizneset që të prodhojnë vetë energjinë.

“Ky lajm është një lajm fantastik për qytetarët shqiptarë të cilët do të kenë matjen vjetore për të mos humbur asnjë kilovat nga prodhimi i energjisë fotovoltaike, po do të kenë edhe benefite të tjera të cilat autoritetet i shprehin. Do të kemi dhe shit-blerje të energjisë ku do të jemi të pavarur. Ky është një lajm fantastik i cili do të jetë një shtytje shumë e mdhe për qytetarët shqiptarë, një shtytje shumë e madhe për biznesin por dhe një përfitim shumë i madh për qytetarët dhe në rradhë të dytë për vetë qeverinë apo autoritetet.” – thotë Z.Paja.

Z. Paja flet për efektet pozitive deri në kalimin e Shqipërisë si vend i pavarur nga energjia.

“Kur sot megavati shkon deri në 1000 euro ne propozojmë që cmimi i blerjes së energjisë të jetë të paktën me 20 lekë/kilovat. Kjo do të mundësojë që investitorët deri në 500 kw do instalojnë panele fotovoltaike dhe Shqipëria do të arrijë të eksportojë energji në rrethe dhe në shtete të tjera. Kjo nënkupton që Shqipëria bëhet vendi i parë në botë i pavarur nga energjia dhe bëhet vendi i parë që eksporton energji dhe rrit mirëqenien e qytetarëve të vetë.”- shton Rako Paja.

Sipas ligjit aktual një shoqëri e vogël apo e mesme, si dhe konsumatorët familjarë mund të instalojnë një kapacitet total deri në 500 KW për prodhimin e energjisë elektrike nga burimet e rinovueshme, si era apo dielli për të mbuluar një pjesë ose të gjithë energjinë që nevojitet dhe ta injektojë pjesën e tepërt në rrjetin e shpërndarjes.

Me projektligjin e ri vetë-konsumatorët e rinovueshëm do të kenë një kapacitet maksimal prej 500 KW dhe do të kenë të drejtë të gjenerojnë, konsumojnë, ruajnë dhe shesin prodhimin e tepërt të energjisë.

Eco Energia është një kompani që operon në fushën e energjisë së rinovueshme, e përqëndruar në sektorin e paneleve fotovoltaike. Kompania jonë ka arritur të lërë gjurmë të konsiderueshme në këtë sektor për shkak të strategjisë së fokusuar në krijimin e avantazheve konkurruese; fokusit në rritjen e marrëdhënieve të partneritetit brenda dhe jashtë Shqipërisë dhe padyshim fal profesionalizmit dhe cilësisë së lartë që ofron.