Instituti i Ngjyrave Pantone ka zbuluar zyrtarisht Ngjyrën e Vitit 2026, duke zgjedhur një nuancë të butë të së bardhës të quajtur “Cloud Dancer”. Sipas ekspertëve, kjo ngjyrë pasqyron frymën kulturore të kohës dhe nevojën për qetësi në një botë gjithnjë e më të mbingarkuar nga teknologjia dhe ritmi i shpejtë i jetës.
Pantone e përshkruan “Cloud Dancer” si një e bardhë e balancuar, e lehtë dhe ajrore, e mbushur me ndjesi paqeje dhe harmonie. Leatrice Eiseman, drejtoreshë ekzekutive e institutit, shprehet se kjo ngjyrë përfaqëson një ndikim qetësues në një shoqëri frenatike, duke nxitur reflektim, mendim të matur dhe rikthim te vlerat e thjeshta.
Sipas saj, “Cloud Dancer” lidhet fort me fillime të reja dhe dëshirën kolektive për një kapitull të freskët, më të pastër dhe më të balancuar.
Pantone shpall Ngjyrën e Vitit që prej vitit 1999, duke analizuar zhvillimet kulturore, politike, sociale dhe trendet në modë e dizajn. Laurie Pressman, zëvendëspresidente e institutit, thekson se edhe emri i ngjyrës ka rëndësi të veçantë, pasi krijon menjëherë një imazh dhe emocion te publiku.
Nuanca e zgjedhur e së bardhës ka një ekuilibër të kujdesshëm mes toneve të ftohta dhe të ngrohta, duke shmangur ndjesinë e sterilitetit apo ftohtësisë ekstreme. Në modë, “Cloud Dancer” mishëron forma të fryra, silueta të lehta dhe materiale natyrale si puplat, ndërsa në dizajnin e brendshëm përshtatet në mënyrë perfekte me dru, gurë dhe elementë natyrorë.
Zgjedhja e vitit 2026 vjen pas ngjyrave të mëparshme si Mocha Mousse për 2025 dhe Peach Fuzz për 2024, duke konfirmuar tendencën drejt toneve që sjellin rehati, qetësi dhe ngrohtësi emocionale./businessmag
