Sipas raportit të fundit të UBS (Union Bank of Switzerland) për pasurinë globale në vitin 2025, Shtetet e Bashkuara dhe Kina zotërojnë së bashku më shumë se gjysmën e pasurisë personale globale (54%). Ndërsa Evropa mban vetëm 22%, me pesë ekonomitë më të mëdha evropiane që dominojnë listën.
SHBA zë më shumë se një të tretën e totalit të pasurisë globale, konkretisht 34.7% apo 151 trilionë euro, ndërsa Kina renditet e dyta me 19.4%, përkatësisht 84.2 trilionë euro. Japonia ndjek në vend të tretë me 4.5% (19.7 trilionë euro). Raporti, që përfshin 56 shtete dhe tregje që përfaqësojnë mbi 92% të pasurisë globale, tregon se në fund të vitit 2024, pasuria personale në shkallë globale arriti në 435 trilionë euro.
Evropa, duke përfshirë BE-në, Mbretërinë e Bashkuar, Zvicrën, Norvegjinë dhe Turqinë, zotëron 22.3% të totalit. Brenda kontinentit, Mbretëria e Bashkuar mban pjesën më të madhe të pasurisë globale me 3.84%, shumë pranë Gjermanisë me 3.76%. Franca ndjek me 3.3%, ndërsa Italia dhe Spanja plotësojnë pesëshen e parë evropiane. Këto pesë ekonomi kryesore së bashku përfaqësojnë 15.1% të pasurisë globale, më pak se Kina, që përbën 19.4%.
Është e rëndësishme të theksohet se këto shifra paraqesin pasurinë totale dhe pjesën që zë çdo vend në nivel global, por nuk tregojnë se cilët qytetarë janë më të pasur në nivel individual.
Sipas raportit, kombinimi i një popullsie të madhe dhe një niveli të lartë të pasurisë për person është arsyeja kryesore që SHBA mban rreth një të tretën e pasurisë globale. Ndërsa Pekini e ndjek me një të pestën falë popullsisë së madhe.
Në vitin 2024, Evropa Lindore regjistroi rritjen më të madhe të pasurisë personale, me mbi 12% krahasuar me një vit më parë, duke ia kaluar edhe Amerikës së Veriut. Rajoni shtoi 28,000 milionerë të rinj, një zgjerim prej 2.9%, duke u kthyer në një motor të fortë të bumit ekonomik. Ndërkohë, Evropa Perëndimore dhe Oqeania pësuan rënie me -1.5%, ndërsa Amerika Latine regjistroi tkurrjen më të madhe me -4.3%./Scan
