“Pedalo në Belsh” është biznesi në fushën e turizmit i themeluar nga Albert Hysa, një 27 vjeçar që jeton në qytetin e Belshit dhe ka përfunduar studimet në degën Shenca Juridike në Sektorin Publik.
Biznesi i biçikletave i themeluar në vitin 2019 ka si qëllim Guidën me bicikleta drejt bukurive natyrore të Belshit ndër to 84 liqenet natyrorë.
I riu, me idenë më të mirë inovative në shërbim të mjedisit dhe të vizitorëve vendas dhe të huaj, tregon eksperiencën e tij në krijimin e kësaj sipërmarrje: “Themelimi i këtij biznesi erdhi falë mbështetjes me grant nga organizata Partners Albania duke qenë se kjo organizatë shpalli një thirrje për aplikim në vitin 2019, pra konkursin e “Ideve të Gjelbërta”, ku çdo i ri mund të aplikonte me një ide biznesi të gjelbër. Unë aplikova me idenë e krijimit të biznesit të biçikletave. Kalova fazën e parë dhe faza e dytë kishte të bënte me prezantimin para jurisë të Idesë së Biznesit ku cilido i ri kishte një ide të tillë. Prej andej ideja ime doli fituese si ideja më e mirë inovative dhe si një risi në qytet, duke qenë se ky shërbim mungonte.”
Kështu, me mbështetjen e Partners Albania ai themeloi biznesin startup me 10 biçikleta fillimisht, të cilat i jepte me qira në qytetin e Belshit. Më vonë, në vitin 2020 ai aplikoi në një tjetër thirrje nga një organizatë maqedonase që kishte si synim mbështetjen e startup-eve të sapokrijuara. Hysa fitoi përsëri grantin për zgjerim, duke shtuar dhe përmirësuar biznesin e tij me 10 biçikleta të tjera.
Duke qenë një risi në qytetin e Belshit, një formë argëtimi që vizitorët dhe turistët e përqafuan menjëherë, kjo i solli biznesit të ardhura, të cilat Hysa i investoi në 10 biçikleta të tjera.
Hysa, si një i ri që krijoi biznesin e tij me kosto zero duke mos e lënë mundësinë t’i ikë nga duart, u bën thirrje të gjithë të rinjve të shfrytëzojnë mundësitë dhe të ndjekin ëndrrat dhe pasionet e tyre për t’i kthyer ato në realitet.
“Thirrja ime për të gjithë të rinjtë është që t’i shohin këto thirrje për aplikime sidomos thirrje për aplikime në këtë kontekst që unë po flisja deri tani, sepse janë mundësi të mira që një i ri me kosto zero të krijoj një biznes të tij. Ndërsa thirrja ime apo ajo që mua do të më ndihmonte në këto kohë do të ishte përfshirja në programe të ndryshme mentorimi, këshillimi për shkak se do të më ndihmonin si të menaxhoja biznesin por edhe si t’u përfshija në programe të tjera që më pas sjellin grante dhe ndihmojnë në ecurinë e biznesit por edhe në zgjerimin e tij.”
Pedalo në Belsh ofron biçkleta për fëmijë, biçikleta për të rritur, scootera elektrike për moshën 10 – 20 vjeç, monapatina për fëmijë 3 – 7 vjeç dhe makina për fëmijë. Nëpërmjet tyre janë ndërtuar guida dhe paketa të ndryshmë turistike.
Guida e parë me biçikleta është e realizueshme në Liqenin e Belshit nëpërmjet korsisë së biçikletave rreth Liqenit me distancë 2.5 km. Në këtë intenerar mund të shikoni sheshin e qytetit, molat turistike të drunjtë brenda në Liqen, kullën panoramike të qytetit, këndet sportive, amfiteatrin e qytetit, karuselin dhe hapësirat e gjelbërta dhe rekreative të ndërtuara së fundmi.
Guida e dytë e quajtur guida e lirë ofron pedalim në intenerarin Belsh – Grekan – Dëshiran – Fierzë – Cerragë nëpërmjet të cilës mund të eksploroni liqenet e shumta dhe natyrën e bukur të Belshit që të krijojnë përjetimin e gjallë të një tabloje mbresëlënëse të jetës së fshatit.
Një tjetër guidë është është pedalimi drejt fshatit turistik Seferan me biçikleta Gt bike ose city bike. Intenerari është Belsh – Seferan me distancë 3 kilometra dhe pedalim 25 minuta. Në fshatin Seferan gjenden bujtinat komode dhe plot shije “Dumrea Rubin” dhe “Bujtina e Trëndafilave”.
E fundit është guida me biçikleta nga sheshi i qytetit drejt Liqenit më të bukur në Dumre siç është ai i Degës ose ndryshe i Luleve. Ky liqen ka formën e hartës së Shqipërisë. Distanca nga Belshi drejt Liqenit të Degës është afërsisht 8 kilometra dhe 40 minuta me pedalim./ProBizz.al
