Ka nisur prej 1 Korrikut aplikimi për kompensimin 10% për fermerët, një mbështetje financiare për ata që kanë dokumentuar shitjet e produkteve bujqësore me autofaturë.
Periudha e aplikimit është nga data 1 Korrik deri më 31 Dhjetor 2026. Gjatë kësaj kohe, fermerët kanë mundësi të aplikojnë për të përfituar kompensimin në masën 10% të vlerës së shitjeve të produkteve bujqësore të realizuara dhe të dokumentuara me autofaturë.
Ky kompensim synon të mbështesë aktivitetin e fermerëve, duke nxitur formalizimin e transaksioneve dhe zhvillimin e sektorit bujqësor.
Aplikimi kryhet tërësisht online, nëpërmjet platformës e-Filing, duke e bërë procesin më të thjeshtë dhe më të shpejtë për të gjithë përfituesit.
Tatimet sqarojnë se fermerët që plotësojnë kriteret, të mos e lënë aplikimin për në momentin e fundit. Në njoftimin e publikuar, nga kjo administratë, ftohen fermerët të përfitojnë nga kjo mundësi për të marrë kompensimin që ju takon, dhe për të përfituar mbështetjen e parashikuar për aktivitetin bujqësor./Scan
