Kupa e Botës 2026 pritet të jetë spektakli më i madh futbollistik në planet, por përveç talentit dhe emocioneve në fushë, turneu do të mbledhë edhe disa nga sportistët më të pasur në histori.
Në krye të listës së futbollistëve me pasurinë më të madhe që pritet të jenë pjesë e Botërorit qëndron Cristiano Ronaldo. Superylli portugez vazhdon të dominojë jo vetëm në aspektin sportiv, por edhe financiar, me një pasuri të vlerësuar në rreth 1.2 miliardë euro. Ai mbetet futbollisti i vetëm në këtë turne që ka kaluar pragun e një miliard eurove.
Pas tij renditet rivali i tij historik, Lionel Messi, me një pasuri të vlerësuar në 868 milionë euro. Dy legjendat e futbollit vazhdojnë të jenë figura dominuese si në fushë, ashtu edhe jashtë saj.
Podiumi plotësohet nga Neymar, i cili zotëron një pasuri prej rreth 391 milionë eurosh. Braziliani mbetet një nga sportistët më të paguar dhe më të marketueshëm në botë.
Në vendin e katërt pozicionohet Kylian Mbappe me 218 milionë euro, duke konfirmuar statusin e tij si një nga emrat më të mëdhenj të futbollit modern. Sulmuesi francez pritet të jetë një nga protagonistët kryesorë të Botërorit 2026.
Pesëshja e parë mbyllet nga Harry Kane, me një pasuri prej 129 milionë eurosh, ndërsa Mohamed Salah renditet i gjashti me 122 milionë euro. Të dy konsiderohen ndër futbollistët më të suksesshëm dhe më të vlerësuar të brezit të tyre.
Më tej në listë gjenden Son Heung-min me 87 milionë euro dhe Riyad Mahrez me 74 milionë euro, duke dëshmuar ndikimin e tyre të madh në futbollin ndërkombëtar dhe suksesin financiar që kanë arritur gjatë karrierës.
Një surprizë për shumë tifozë është pozita e Erling Haalandit. Pavarësisht se konsiderohet një nga sulmuesit më të frikshëm në botë, norvegjezi renditet i nënti me 69 milionë euro pasuri. Mosha e re dhe karriera ende në ngritje shpjegojnë diferencën me emrat më të konsoliduar të listës.
Me miliarda euro pasuri të kombinuara dhe me vëmendjen e mbarë botës të përqendruar tek ta, këta futbollistë pritet të jenë jo vetëm yjet e fushës, por edhe ikonat financiare të Botërorit 2026.
