Jeta e Nazim Salihut është dëshmi e gjallë se kur bashkohen pasioni dhe këmbëngulja, ëndrrat më të mëdha materializohen. Një udhëtim prej më shumë se 40 vitesh, i cili filloi në Shkup në vitet ’70 dhe sot vazhdon në studiot e televizionit në SHBA.
Nga ëndrra për flokët te suksesi i parë në Evropë
Që nga fëmijëria, Nazimi ëndërronte për dy gjëra: mikrofonin dhe artin e parukerisë. Megjithëse prindërit e tij e drejtuan fillimisht drejt mjekësisë, pasioni i tij i vërtetë nuk u ndal. Gjatë studimeve në shkollën e mesme mjekësore, ai vazhdoi të përsoste aftësitë e tij si parukier, duke ndjekur seminare në mbarë Evropën dhe duke fituar përvojë.
Këmbëngulja e tij i dha frytet shumë shpejt. Në vitet 1991-1993, Nazimi u bë pjesë e garave evropiane të parukerisë, duke shkëlqyer dhe duke arritur suksese të shumta, ku kulmi ishte vendi i dytë në 1992. Këto suksese të hershme e konfirmuan atë se rruga e artit ishte e duhura për të.
“Noli Salon” dhe kthimi te kamera
Pas kthimit në Kosovë, Nazim Salihu ndërtoi një emër të mirë në këtë fushë. Për 18 vite, “Noli Salon” u bë një adresë e njohur për stil dhe cilësi, duke e bërë atë një figurë të respektuar. Por ëndrra për mikrofonin dhe kamerën ende e tundonte. Bleu kamerën e parë “Panasonic” gjatë viteve të vështira të okupimit serb dhe filloi të regjistronte, duke lënë dëshmi të një pasioni që do të zgjaste për dekada.
Lufta e vitit 1999 i dha një kthesë të papritur jetës së tij, duke e çuar atë dhe familjen e tij në SHBA, ku filloi një kapitull i ri plot sfida dhe shpresa.
Një fillim i ri në SHBA: Nga parukieri te gazetari
“Është vendi i mundësive, do t’ia dal!” – kjo ishte moto me të cilin Nazimi përballoi sfidat e reja. Pas 8 vitesh në Minnesota, ku punoi si parukier dhe përkthyes në “State Capital Building”. Më pas u vendos në Connecticut. Afërsia me Nju Jorkun i dha hapësirë për të zhvilluar idetë e tij.
Pranë studiove të mëdha televizive, ai hapi biznesin e ri pranë televizionit të madh “Channel 3 Eyewitness News”. Aty krijoi lidhje të ngushta me drejtues, gazetarë dhe producentë. Në vitin 2012 u punësua si person përgjegjës për përgatitjen e të ftuarve në studio televizive. Por përsëri i mungonte mikrofoni.
Me ndihmën e drejtuesve të televizionit, Nazimi filloi të prodhojë emisione për komunitetin shqiptar. Kështu lindi projekti i tij i parë mediatik: një radio online me emisionin “Me pjesëtarët e artit dhe sukseset e shqiptarëve në glob”. Suksesi i këtij projekti e shtyu atë të kalojë në transmetime televizive live përmes “Skype Broadcast”, ku deri më sot ka realizuar mbi 250 intervista me personalitete të shquara të komunitetit tonë.
Hollywood dhe Përparimi i Vazhdueshëm
Pasioni për artin nuk ka kufij. Në vitin 2012, Nazim Salihu përfundoi studime për “Special Effects Make-Up Artist” në Beverly Hills, Hollywood. Kjo hapi dyert për punë në “TLC Reality Show” dhe produksione ndërkombëtare, pra një dimension tjetër në portofolin e tij artistik.
Këshilltar për Kulturë dhe Art në Pan Vatrën
Një nga momentet më të veçanta të karrierës së tij ndodhi së fundmi, më 29 janar 2024, kur u ftua nga Presidenti i “Pan Vatra”, z. Elmi Berisha, dhe u emërua “Këshilltar për Kulturë dhe Art”. Kjo pozitë e rëndësishme e dha atij mundësinë të promovojë dhe të presë artistë, shkrimtarë dhe intelektualë nga të gjitha trojet shqiptare, duke për bashkëpunime kulturore.
“Noli TV”: Realizimi i një ëndrre
Sot, Nazim Salihu është një emër i njohur në media. Ai është gazetar i licencuar në IAPP Press dhe USPA dhe ka akreditimin përkatës nga shteti amerikan. Përmes emisioneve të tij në Rocky Hill Community TV dhe, më e rëndësishmja, përmes kanalit të tij televiziv “Noli TV” (i cili transmeton në TV Alb – kanali 39 dhe Nimi TV – kanali 249).
Nazim Salihu-Noli e përmbledh vetë udhëtimin e tij me një ndjenjë krenarie të thellë: “Jam shumë krenar që kam pasur mundësinë të intervistoj personalitete të rëndësishme shqiptare dhe të promovoj artin, kulturën dhe suksesin tonë në mbarë botën.”
Dhe kjo, më duket, është trashëgimia e vërtetë e një jete të jetuar me pasion dhe për pasion.
