Agjencia Kombëtare e Punësimit dhe Aftësive ka publikuar statistikat mbi formimin profesional për periudhën Janar-Mars 2026, duke evidentuar një rritje të pjesëmarrjes në këto programe.
Sipas të dhënave nga AKPA, 2.710 individë kanë përfituar nga formimi profesional gjatë këtij tremujori, duke shënuar një rritje prej 24% krahasuar me të njëjtën periudhë të një viti më parë. Ky zhvillim konsiderohet një tregues pozitiv për rritjen e interesit ndaj aftësimit dhe përmirësimit të kapaciteteve për tregun e punës.
Nga ana tjetwr, rezultatet tregojnë një përfshirje të gjerë të grupeve vulnerabël në këto programe. Konkretisht 1.595 përfitues janë të rinj deri në moshën 29 vjeç, ndërsa 1.380 janë gra dhe vajza që kanë ndjekur kurse profesionale. Këto kurse synojnë jo vetëm pajisjen e pjesëmarrësve me njohuri teorike, por mbi të gjitha me aftësi praktike, të cilat rrisin më tej mundësitë për punësim afatgjatë.
Po kështu, 378 pjesëmarrës i përkasin skemës së ndihmës ekonomike, shifra që tregojnë se programet e formimit po shërbejnë si një mekanizëm për riintegrimin social dhe ekonomik të kësaj kategorie.
Gjithashtu, 100 pjesëtarë nga komuniteti Rom dhe Egjiptian kanë marrë formim profesional, ndërsa 50 të tjerë janë persona me aftësi të kufizuara, duke reflektuar përpjekjet për përfshirje dhe barazi në aksesin ndaj aftësimit profesional.
Agjencia Kombëtare e Punësimit dhe Aftësive thekson se qëllimi kryesor mbetet rritja e aftësive profesionale të qytetarëve dhe garantimi i mundësive të barabarta për një integrim të qëndrueshëm në tregun e punës.
