Pak ditë përpara nisjes së vitit të ri shkollor, prindërit po përballen me faturën e përgatitjes së fëmijëve. Për vitin shkollor 2026–2027, nxënësit e klasave të para deri në të pesta të shkollave publike pajisen me tekste falas, ndërsa ata të klasave të gjashta deri në të nënta i marrin librat në përdorim falas. Në arsimin e mesëm, nga kjo skemë përfitojnë vetëm kategori të veçanta nxënësish.
Edhe pse tekstet sigurohen falas për një pjesë të nxënësve, blerja e çantës, mjeteve kancelarike, veshjeve dhe këpucëve kërkon një shumë të konsiderueshme. Një çantë standarde kushton rreth 2,500 lekë, ndërsa ato më cilësoret arrijnë deri në 5 mijë lekë, pa përfshirë kuletën e mjeteve shkollore, e cila kushton nga 350 lekë ato të thjeshtat, në 3 mijë lekë ato me të gjitha mjetet e nevojshme brenda.
Më pas vjen mbushja e çantës. Dhjetë fletore kushtojnë rreth 700 lekë, ndërsa lapsat me ngjyra variojnë nga 230 deri në 500 lekë. Me stilolapsat, lapsat, gomën, mprehësen, vizoret, bllokun e vizatimit, dosjet dhe mbështjellëset, vetëm kancelaritë mund të kushtojnë nga 2,500 deri në 4 mijë lekë. Në total, çanta së bashku me mjetet bazë shkollore kërkon të paktën 3,500 deri në 4 mijë lekë në variantin më ekonomik. Për produkte të një cilësie mesatare, fatura llogaritet nga 5,500 deri në 7 mijë lekë.
Por shpenzimet nuk mbyllen me kancelaritë. Një palë atlete për fëmijë kushton nga rreth 1,900 lekë për modelet me ulje dhe arrin deri në 4,900 lekë. Nëse shtohen dy palë pantallona, disa bluza, çorapet dhe një komplet sportiv, vetëm veshjet mund të kërkojnë nga 10 deri në 15 mijë lekë të tjera. Kështu, përgatitja ekonomike e një nxënësi për vitin e ri shkollor nis nga rreth 15 mijë lekë. Për një shportë standarde, që përfshin çantën, kancelaritë, veshjet dhe atletet, shpenzimi mund të arrijë nga 20 deri në 27 mijë lekë. Për një familje me dy fëmijë, fatura e përgatitjes mund të kalojë 40 mijë lekë./Scan
