Guvernatori i Bankës së Shqipërisë, Genc Sejko, në një konferencë për shtyp deklaroi se aktiviteti ekonomik në vend po njeh rritje dhe vendi ka filluar rimëkëmbjen pas periudhës së vështirë të pandemisë megjithëse risqet janë të pranishme në afatin e shkurtër dhe të lidhura kryesisht me pandeminë.
Guvernatori Gent Sejko deklaroi pas mbledhjes së Këshillit Mbikëqyrës se qeveria duhet të vijojë me reformat strukturore për të përmirësuar klimën e biznesit dhe mbështetur ekonominë.
“Këshilli Mbikqyrës konstaton se balanca e rreziqeve vijon të mbetet në kahun e poshtëm në afatshkurtër, por shfaqet më e balancuar në afatmesëm. Në veçanti, rreziqet e kahut të poshtëm në afatshkurtër burojnë nga një përmirësim më i ngadaltë se pritjet e situatës epidemiologjike në vend dhe në botë, nga vështirësitë e mundshme në mekanizmin e transmetimit të politikës monetare, si dhe nga një reagim më i ngadaltë i biznesit dhe familjeve ndaj kushteve të përmirësuara financiare”,-tha Sejko.
Raporti analizon situatën ekonomike gjatë pandemisë, ku u vërejt tkurrje e aktivitetit ekonomik 3.3% dhe humbje e rreth 43,000 vendeve të punës, përveç një ngadalësim në rritjen e pagave dhe investimeve.
Sejko theksoi se sektori financiar paraqitet veçanërisht i qëndrueshëm, edhe pas lehtësimit të rregullave nga Banka e Shqipërisë për bankat e nivelit të dytë, duke i mundësuar atyre të ndihmojnë me fleksibilitet bizneset dhe familjet.
“Në muajin mars 2021, treguesi i kredive me probleme zbriti nën nivelin 8%, duke regjistruar vlerën më të ulët të regjistruar prej vitit 2009,”-shtoi Sejko.
Guvernatori tha se projeksionet e Këshillit Mbikqyrës të Bankës së Shqipërisë mbeten pozitive./ProBizz.al/
